Al Jazeera njofton se rusët kanë kërcënuar sot se do të nisin prej së martës të veprojnë në mënyrë të njëanshme për t’u dhënë fund shkeljeve të supozuara të armëpushimit në Siri nëse Moska dhe Uashingtoni nuk arrijnë një marrëveshje se si do të sillen me këto shkelje.
Rusia, gjithnjë sipas burimit të mësipërm informativ, po kërkon bisedime urgjente me SHBA-të në përgjigje të shkeljeve të pretenduara të armëpushimit nga grupet opozitare në Siri.
Një deklaratë e Ministrisë ruse të mbrojtjes thoshte mes të tjerash se, “Shtyrjet e mëtejshme të zbatimit të rregullave të pranuara të reagimit ndaj shkeljeve të regjimit të armëpushimit në Siri janë të papranueshme.”
Ndërprerja e luftimeve më 27 shkurt i ka reduktuar ndjeshëm shkëmbimet e zjarrit në Siri, por nga të dy palët ndërluftuese, si nga regjimi sirian dhe nga forcat opozitare, ka ankesa për shkelje të armëpushimit.
Rusia i tërhoqi ditë më parë një pjesë të mirë të forcave nga Siria, por ende atje ka një prani të konsiderueshme të tyre. /tesheshi.com/
