Ministrat e Jashtëm të Rusisë, Iranit dhe Sirisë patën ditën e djeshme një takim të përbashkët në Moskë vetëm pak pasi kryeqytetin rus e vizitoi sekretari amerikan i Shtetit.
Ndërsa shtrënguan duart së bashku, Sergey Lavrov, Mohammad Javad Zarif dhe Walid Moallem e paralajmëruan Uashingtonin se nëse do të kishte sulme të tjera kundër qeverisë siriane dhe forcave të saj, atëherë pasojat do të ishin të rënda për sigurinë rajonale dhe globale.
Sergey Lavrov e quajti shkelje flagrante të ligjit ndërkombëtar sulmin amerikan me raketa mbi bazën ajrore siriane ditë më parë, e tha se Uashingtoni po kërkonte përligjje për ndryshimin e regjimit në Siri.
Për kryediplomatin sirian, Walid Moallem, takimi në Moskë ishte një mesazh për Shtetet e Bashkuara të Amerikës. Tre vendet kanë procedura të përbashkëta kundër çdo agresioni, deklaroi ai, duke iu referuar Rusisë, Sirisë dhe Iranit.
Mohammad Javad Zarif, nga ana e tij, do të vinte në pah kundërshtinë e Teheranit, Moskës dhe Damaskut ndaj veprimeve të njëanshme amerikane.
Rusia dhe Irani janë dy aleatët më të ngushtë të Bashar Assad-it dhe regjimit të tij. Ato janë dhe kundërshtuesit më të zëshëm të sulmit amerikan të para disa ditëve mbi një bazë ajrore në Siri. /tesheshi.com/
