Zyra e prokurorit të përgjithshëm të Rusisë ka kritikuar refuzimin e fundit të Interpolit, që investitori anglo-amerikan, William Browder, të përfshihet në listën ndërkombëtare të personave të kërkuar, ka raportuar agjencia shtetërore ruse e lajmeve, TASS.
Sipas kësaj agjensie, Ministria e Brendshme ruse, në qershor të këtij viti, ka dërguar kërkesë pranë Interpolit për arrestimin e Browderit me akuzën e “krimeve konvencionale”.
“Pavarësisht nga kjo, Interpoli ka refuzuar t´a përfshijë atë në listën e të kërkuarve, duke cituar një vendim të mëparshëm”, ka njoftuar zyra e prokurorit rus.
Këshilli i Evropës këtë vit ka kritikuar përpjekjet e Rusisë për arrestimin e Browder, nëpërmjet Interpolit, duke vlerësuar se ky rast paraqet “abuzim” të sistemit nga shtetet anëtare duke synuar arritje të “qëllimeve politike”.
Investitori vazhdimisht i ka hedhur poshtë akuzat ruse kundër tij. /tesheshi.com/
