Russia Today përcjell përmes një raportimi nervozitetin e pafshehur të Moskës ndaj ratifikimit të anëtarësimit në NATO nga parlamenti i Malit të Zi ditën e djeshme.
Sipas Ministrisë së Jashtme ruse, ky ratifikim me një votë parlamentare në vend të një referendumi është shkelje e normave demokratike.
Diplomacia ruse shpreh kështu “keqardhjen e thellë që udhëheqja aktuale [e Malit të Zi] dhe mbështetësit e saj perëndimorë nuk e dëgjuan zërin e arsyes dhe ndërgjegjes”.
Ajo pretendon se vullneti i thuajse gjysmës së popullsisë së Malit të Zi qe shpërfillur nga autoritetet vendore me këtë votim në parlament.
Deklarata e Ministrisë së Jashtme të Rusisë i forcon tonet më tej, duke paralajmëruar për zhvillime reaguese.
“Moska nuk mund t’i shpërfillë pasojat strategjike të këtij hapi. Prandaj rezervojmë të drejtën të marrim vendime të tilla që kanë për qëllim të mbrojnë interesat tona dhe sigurinë tonë kombëtare.”
Parlamenti malazez e ratifikoi të premten anëtarësimin në NATO me një votim ku mungonin deputetët e opozitës.
Mali i Zi gjendet në zonën e influencës ruse në Ballkan, çka e bën të kuptueshëm dhe reagimin nervoz të Moskës. Malazezët kanë fajësuar rusët dhe për përpjekjen e dështuar për grusht shteti tetorin e 2016-s; një përpjekje për të penguar mes të tjerash anëtarësimin në NATO të Malit të Zi. /tesheshi.com/
