Moska i kërkoi Beogradit një qëndrim zyrtar për informacionin se një sasi armësh në Ukrainë i ishin dorëzuar nga Serbia, tha zëdhënësja e Ministrisë së Punëve të Jashtme të Rusisë, Maria Zakharova.
“Ne tashmë i kemi kërkuar Beogradit të bëjë një deklaratë. Deklarata të tilla nuk duhet të bëhen as përmes mediave, as përmes kanalit Telegram, as përmes rrjedhjeve të informacionit, por përmes qëndrimit të shpallur zyrtarisht të palës serbe”, ka thënë Zaharova.
Ajo shtoi se duhet të zbulohen faktet dhe në bazë të tyre duhet të nxirren përfundimet e duhura sepse është një “temë jashtëzakonisht e rëndësishme për marrëdhëniet dypalëshe”.
Më herët, Zakharova deklaroi se Moska është thellësisht e shqetësuar për akuzat për përfshirjen e Serbisë në shitjen e armëve në Ukrainë.
“Ne po e ndjekim me vëmendje këtë histori, i kushtuam vëmendje diskutimit të fundit për këtë temë në Kuvendin e Serbisë. Informacioni që qarkullon sigurisht që na shkakton shqetësimin më të thellë”, ka thënë ajo në një koment të publikuar në faqen e ministrisë.
Më parë, mediat ruse dhe kanalet Telegram raportuan se Serbia dërgoi fshehurazi 3500 raketa për sistemet raketore “Grad” në Ukrainë përmes Turqisë dhe Sllovakisë.
Por kompania Krušik njoftoi këtë javë se kjo dërgesë në asnjë mënyrë nuk është e lidhur me shitjen e raketave tek përdoruesi përfundimtar nga Ukraina.
Ministri serb i Mbrojtjes Millosh Vuçeviç mohoi të hënën se Serbia eksporton armë në Ukrainë.
“Nëse kompanitë private blejnë në tregje të treta dhe u shesin kompanive në vende të tjera nuk është çështje për Serbinë, është tregti ndërkombëtare. Për ne mund të jetë një informacion interesant në kuptimin e informacionit dhe jo detyrim ligjor apo rregullore”, tha Vuçeviç në Kuvendin e Serbisë, i pyetur nga përfaqësuesi i opozitës për rastin. /tesheshi.com/
