Rrjeti informativ Al Jazeera njofton se rusët po diskutojnë një plan për operacione tokësore në Siri, duke e shtënë kështu konfliktin e përgjakshëm pesëvjeçar në një fazë të re.
Një ish-zyrtar rus i ka thënë Al Jazeera-s se presindenti Putin mund të dislokojë forca speciale operacionale në terren në Siri.
Raportohet se Putin po e diskuton me komandantët ushtarakë mundësinë e dislokimit të trupave luftarake, edhe pse më herët ai pati deklaruar se nuk kishte plane për diçka të tillë.
“Kjo është në diskutim; ka plane për këtë,” ka bërë të ditur për Al Jazeera-n Andrei Fyodorov, një ish-zëvendësministër për punët e jashtme.
Trupat mund të jenë forca speciale ose ushtarë vullnetarë që janë të gatshëm të luftojnë përkrah ushtrisë siriane të regjimit të Esadit.
Ndërkaq, dje ka patur sulme ajrore dhe me raketa të ushtrisë qeveritare mbi pjesën lindore të Halepit, që kanë sjellë vdekjen e 19 civilëve, gjashtë prej të cilëve kanë qenë fëmijë.
“Pesë njerëz, duke përfshirë tre fëmijë, u vranë nga sulmet me raketa në lagjen el-Emirije, dhe 14 të tjerë, mes të cilëve tre fëmijë, gjetën vdekjen nga sulmet ajrore në katër pjesë të tjera,” ka pohuar për agjencinë e lajmeve AFP një burim i mbrojtjes civile. /tesheshi.com/
