Daily Sabah i referohet këtë mëngjes agjencisë së lajmeve Anadolu Agency teksa raporton se Rusia dhe Turqia kanë gjetur gjuhën e përbashkët për një plan për një armëpushim në të gjithë Sirinë.
Dy vendet që ndërmjetësuan për evakuimin e njerëzve nga pjesa lindore e Halepit ditë më parë mësohet të kenë arritur një marrëveshje për një projektplan për vënien në zbatim të një armëpushimi anembanë Sirisë.
Burimet, thotë Daily Sabah, bëjnë me dije se Rusia dhe Turqia do të kenë synim garantimin e nisjes së armëpushimit që nga orët e natës të së mërkurës.
Po qe se armëpushimi do të respektohet nga palët, pritet të regjimi i Beshar Esadit dhe opozitarët të nisin negociatat për bisedimet e paqes, të ndërmjetësuara nga Turqia e Rusia.
Presidenti rus, Vladimir Putin, do të deklaronte të premten e shkuar se vendi i tij dhe Turqia kishin rënë dakort për t’i bërë bashkë në Kazakistan përfaqësuesit e regjimit sirian dhe të opozitës siriane. /tesheshi.com/
