Rusia dhe forcat siriane të regjimit njoftuan për pezullimin e luftimeve në lindje të Halepit për t’u dhënë mundësi civilëve të largohen nga lagjet e rrethuara. Por njoftimi përgënjeshtrohet nga banorët dhe kryengritësit, që flasin për vazhdim të bombardimeve.
Ministri i Jashtëm rus, Sergey Lavrov, bëri të ditur një ditë më parë se forcat qeveritare siriane i kishin pezulluar aksionet luftarake në lindje të Halepit për t’u dhënë mundësi mijëra civilëve për t’u larguar që andej.
“Operacionet luftarake nga ushtria siriane në lindje të Halepit janë pezulluar për shkak se po kryhet operacioni i madh i evakuimit të civilëve, i rreth 8.000 njerëzve,” u shpreh Lavrov.
Përndryshe, Al Jazeera informon se pak pas deklarimit të kryediplomatit rus, banorë të Halepit kanë rrëfyer se avionët ishin ende në qiell e se artileria vazhdonte të bombardonte në zonën e rrethuar të qytetit.
“Bombardimi është i pabesueshëm. Sulmet po vazhdojnë ende. Vetëm gjysmë ore më parë kishte dy sulme me bomba fuçi në Bustan el-Kasr… Avionët luftarakë janë ende në qiell,” i pohoi një gazetar Al Jazeera-s nga terreni.
Ndërkaq, Asambleja e Përgjithshme e OKB-së pritet të votojë sot një projektrezolutë e cila bën thirrje për një armëpushim të menjëhershëm.
Sipas drejtuesit të këshillit lokal të Halepit, gjatë 26 ditëve të fundit janë vrarë në lindje të qytetit 800 persona, e janë plagosur 3.500 të tjerë. /tesheshi.com/
