Halepi është tani qendra e luftimeve në Siri. Beteja për të do të jetë vendimtare për të ardhmen e konfliktit më tepër se pesëvjeçar. E pse është e tillë, ajo ka marrë nota më tragjike, me civilët të mbetur të ndarë mes dy kampeve.
OKB-ja do të kërkonte 48 orë ndërprerje të luftimeve për t’u ardhur në ndihmë civilëve të Halepit përmes shpërndarjes së ndihmave. Ndërkohë, ushtria ruse ka deklaruar se çdo ditë do të ketë një ndërprerje treorëshe të zjarrit për të mundësuar mbërritjen e ndihmave.
Një zyrtar i Ministrisë ruse të Mbrojtjes bëri të njohur në Moskë se të gjitha veprimet ushtarake, sulmet ajrore dhe të artilerisë, do të ndalen mes orës 10:00 dhe 13:00.
“Për të garantuar sigurinë e plotë për autokolonat drejt Halepit do të ketë pushime të shkurtëra humanitare, të vendosura nga ora lokale 10:00 deri në 13:00, duke filluar nga nesër, gjatë së cilave do të ndërpriten të gjitha luftimet ushtarake, sulmet ajrore dhe sulmet e artilerisë,” u tha të mërkurën gazetarëve gjeneralkoloneli rus Sergei Rudskoy.
Një lëvizje që nuk është mirëpritur nga OKB-ja, e cila e ka parë ndalimin e zjarrit për tre orë si të pamjaftueshëm për t’u ardhur në ndihmë miliona njerëzve në nevojë.
Në të njëjtën kohë, mjekët e mbetur në Halep i kanë bërë thirrje presidentit amerikan Obama për ndihmë.
Të 29 mjekët e mbetur në qytet i kanë kërkuar Obama-s të ndërhyjë për krijimin e një zone në lindje të Halepit që të jetë e mbrojtur nga sulmet ajrore. Ata kanë kërkuar veprim ndërkombëtar për të garantuar që Halepi të mos rrethohet kurrë më.
“Ne jemi 29 mjekët e fundit që u shërbejmë 300.000 qytetarëve të mbetur të Halepit lindor. Trupat e regjimit kanë kërkuar ta rrethojnë dhe ta bllokojnë tërë lindjen e qytetit…. Rrethimi është hequr, mbase përkohësisht, por jo me diplomaci. Në jetojmë apo vdesim, ngjan të varet nga uljet e ngritjet e fushëbetejës.
Me gjithë tmerrin, ne zgjodhëm të jemi këtu. Ne morëm zotimin për t’i ndihmuar ata në nevojë.
Z. president, ne kërkojmë që ju të bëni dhe detyrën tuaj.
Ne nuk kemi nevojë për lot, për keqardhje apo madje për lutje: ne kemi nevojë dëshpërimisht për një zonë të lirë nga bombardimi mbi Halepin lindor për t’i ndaluar sulmet, si dhe për veprim ndërkombëtar për të garantuar që Halepi të mos rrethohet kurrë më,” thuhet mes të tjerash në letrën e mjekëve të mbetur në Halep. /tesheshi.com/
