Anëtarët e një njësie komando të ushtrisë afgane të braktisur nga SHBA dhe aleatët perëndimorë pasi vendi ra në duart e talebanëve vitin e kaluar thonë se po marrin oferta për t’u bashkuar me ushtrinë ruse në luftën në Ukrainë, shkruan portali Foreign Policy.
Burime të shumta ushtarake dhe të sigurisë afgane thanë se forcat e stërvitura nga SHBA, të cilat kanë luftuar përkrah ushtarëve amerikanë dhe forcave të tjera speciale aleate për gati 20 vjet, mund të bëjnë ndryshimin që i nevojitet Rusisë në fushën e betejës ukrainase.
Pas tërheqjes së SHBA nga Afganistani në gusht 2021, midis 0,000 dhe 30,000 komando mbetën në atë vend aziatik, ndërsa vetëm disa qindra oficerë të lartë u evakuuan.
SHBA shpenzoi 90 miliardë dollarë për trajnime
Shumë nga ata që kanë mbetur janë fshehur për të shmangur kapjen dhe likuidimin nga talebanët.
SHBA shpenzoi gati 90 miliardë dollarë për trajnimin e forcave afgane, dhe komandot u trajnuan nga Forcat e Marinës së SHBA-së dhe SAS (Shërbimi Special Ajror) britanik.
Këta ushtarë tani, sipas FP, janë të pashpresë dhe të papunë, duke pritur mundësinë e lëvizjes në SHBA ose Britaninë e Madhe dhe janë objektiva të lehta për ata që kërkojnë mercenarë që do të luftonin për Rusinë.
Një ish-oficer i komandove afgane pretendon se ai beson se njësia mercenare ruse Wagner qëndron pas përpjekjes për t’i rekrutuar ata.
“Është Grupi Wagner. Ata mbledhin njerëz nga të gjitha anët. Do të ishte më mirë që këta ushtarë të përdoreshin për të luftuar në anën e Ukrainës, sepse ata nuk duan luftëtarë për Rusinë, e cila është armiku. Por çfarë mund të bëj tjetër?”, pyeti ai.
Disa ish komando raportojnë se janë kontaktuar përmes WhatsApp dhe Signal me oferta për t’u bashkuar me atë që disa ekspertë e quajnë “legjionin e huaj” të Rusisë për të luftuar në Ukrainë.
Lajmi për tentativën e angazhimit ka ndezur alarmin në ish-qarqet ushtarake dhe të sigurisë në Afganistan, me disa që pretendojnë se deri në 10,000 ish-komandë mund të jenë të ndjeshëm ndaj ofertave ruse.
Ata presin të punojnë për tre dollarë në ditë
Siç tha një burim tjetër ushtarak: “Ata nuk kanë tokë, nuk kanë punë, nuk kanë të ardhme. Ata nuk kanë asgjë për të humbur.”
“Ata presin të punojnë në Pakistan për tre ose katër dollarë në ditë, ose në Turqi për 10 dollarë. Kur Wagner ose dikush tjetër vjen dhe u ofron 1000 dollarë për të luftuar përsëri, ata nuk do t’i refuzojnë. Nëse punësojnë vetëm një, ai do të sjellë gjysmën e njësisë së vjetër me vete, sepse janë si vëllezër”, thotë burimi.
Teksti thekson se shumë nga ushtarët afganë ndihen të braktisur dhe të zhgënjyer pasi SHBA-ja dhe forcat aleate u larguan nga Afganistani. /tesheshi.com/
