Nëse Italia vuajti për të fituar 1-0 ndaj Izraelit dhe Spanja nuk u lodh të shënonte 8 gola ndaj modestëve të Lihtenshtejnit, mediat italiane e kanë pasur njërin sy te takimi që u luajt në Strumicë mes Shqipërisë dhe Maqedonisë.
“Sigurisht një ndeshje e fortë mes dy skuadrave. Djemtë e stërvitur nga Panuçi provuan të godasin në transfertë me golin e Roshit në minutën e 53-të. Por palermitani Trajkovski (luan me Palermon në Itali) barazoi me një penallti në të 78-ën. Më pas Pandev dhe shokët e tij provuan deri në fund, por Berisha ishte në formë të shkëlqyer në të paktën dy raste duke blinduar portën e shqiptarëve”, shkruan Gazzeta dello Sport.
Në vijim artikulli vazhdon duke bërë një përshkrim të aksionit të golit të kuqezinjve dhe penalltisë së fituar nga maqedonasit, për tu mbyllur me frazën “barazimi i shkon për shtat edhe Italisë”.
Dy takimet e ardhshme të kombëtares shqiptare janë kundër Spanjës dhe Italisë. Shqipëria ndodhet në vendin e tretë në grup, ndërsa Italia në të dytin. /tesheshi.com/
