Në skajin veriperëndimor të Rusisë dhe afër kufijve të tre vendeve skandinave në veri të kontinentit të vjetër, pranë pikës gjeografike që ndan dy kampet, Moska ka vënë në gatishmëri bombarduesin më të madh bërthamor në botë, në pritje të urdhwrit qw të ngrihet.
Historia nisi pak ditë më parë, kur operatori satelitor amerikan Planet Labs vuri re një prani të shtuar të bombarduesve strategjikë rusë Tupolev Tu-160, më saktë në bazën Olenja, e cila është vetëm 20 milje nga kufiri norvegjez.
Sipas një raporti të publikuar nga gazeta britanike The Sun, pamjet satelitore të marra më 7 tetor tregojnë shtatë bombardues strategjikë të këtij lloji, njëri prej të cilëve është gati për ngritje, në pistën e bazës ajrore të vendosur në Gadishullin Koljski.
Bombarduesi Tu-160 ose “Mjellma e Bardhë”, siç pëlqejnë ta quajnë rusët, është një pseudonim që në shikim të parë sugjeron se jeni përballë një aeroplani të madh luftarak që mban disa raketa. Por e vërteta është se ajo shkon përtej gjithçkaje që simbolizon ngjyra e bardhë, sepse është bombarduesi strategjik më i rrezikshëm nga koha sovjetike deri në ditët e sotme.
Ai klasifikohet si avioni luftarak më i madh dhe më i rëndë ndonjëherë, i aftë të mbajë 40 ton municione dhe të fluturojë 7500 milje pa u ndalur ose pa pasur nevojë për karburant. Ai ka një sistem furnizimi me karburant gjatë fluturimit dhe kapaciteti i rezervuarit të tij është 130 ton. Ekuipazhi i avionit përbëhet nga katër persona: pilot, bashkë-pilot, teknik i armëve dhe teknik i sistemeve të mbrojtjes.
Bombarduesi, i projektuar nga byroja e projektimit të epokës sovjetike, Tupolev, është 54 metra i gjatë, me një peshë bosh prej 110 tonësh, ndërsa pesha maksimale e ngritjes arrin në 275 tonë. Ai mund të mbajë deri në 12 raketa bërthamore me rreze të shkurtër veprimi, mesatarisht rreth 3500 kilometra.
Një përbindësh bërthamor fluturues pranë hapësirës ajrore të NATO-s
Modeli i parë i këtij “përbindëshi bërthamor fluturues” u ngrit në dhjetor 1981 dhe prodhimi aktual filloi në 1984 dhe deri në vitin 2000, ishin prodhuar 35 njësi. Moska më pas vendosi në vitin 2015 të prodhojë avionin në një version të përmirësuar.
Ky bombardues strategjik hipersonik ka gjithashtu aftësinë për të rregulluar lakimin e krahëve, me një sipërfaqe prej 400 metrash katrorë, nga 20 në 65 gradë, dhe është i pajisur me motorë të tipit “Kuznetsov”.
Në korrik, Rusia kreu testet e bombarduesit të saj të fuqishëm strategjik mbi Polin e Veriut, kur ai fluturoi në ajër për shtatë orë, i shoqëruar nga luftëtarët MiG-31.
Ajo shkaktoi kriza që mund të shndërroheshin në luftëra
Në disa raste, këta avionë, të cilët Perëndimi i quan “Black Jack”, shkaktuan kriza që pothuajse u shndërruan në konflikte ushtarake me disa vende të Organizatës së Traktatit të Atlantikut të Veriut (NATO).
Një rast i tillë ka ndodhur kur aviacioni ushtarak francez ka kapur dy avionë të këtij lloji në shkurt të vitit 2017, teksa po fluturonin pranë brigjeve franceze.
Gjithashtu në korrik të vitit 2021, dy avionë rusë të të njëjtit lloj iu afruan hapësirës ajrore britanike, përpara se të përziheshin nga avionët luftarakë britanikë.
Duke komentuar këto incidente, Sekretari i Përgjithshëm i NATO-s, Jens Stoltenberg tha në atë kohë se “rusët thjesht po testojnë gatishmërinë tonë, por ka edhe një qëllim për të treguar forcë dhe për të provokuar”. Ai theksoi se mesazhi i tyre është: “Ne nuk kemi frikë nga NATO-ja, ne mund t’ju sulmojmë thellë dhe t’ju bëjmë dhimbje me këta bombardues bërthamorë.
Shqetësimet janë rritur kohët e fundit pasi presidenti rus Vladimir Putin përsëriti kërcënimet e tij për të nisur një luftë bërthamore kundër kampit perëndimor, veçanërisht NATO-s. Moska e akuzon këtë aleancë për nxitjen e luftës ruso-ukrainase duke ofruar mbështetje të pakufizuar ushtarake për aleatin e saj Kiev.
Homologu amerikan i bombarduesit Tu-160, cili është më i fortë?
Edhe pse avantazhi në betejë është në favor të “Mjellmës së Bardhë”, sipas ekspertëve të fushës së aviacionit ushtarak, bombarduesi që është më afër në krahasim me “Tu-160” është homologu amerikan i B-1 Lancer, një bombardues strategjik me shumë qëllime me rreze të gjatë.
Shpejtësia e tij është rreth 1.2 Mach, dhe është në gjendje të fluturojë në një lartësi prej më shumë se nëntë mijë metra. Avioni mund të fluturojë rreth Tokës pa u ndalur, nëse furnizohet me karburant në ajër, thuhet në faqen e internetit të kompanisë amerikane “Boeing”, e cila merret me prodhimin e B-1 Lancer.
Kapaciteti mbajtës i avionit është 33.3 ton dhe mund të mbajë 24 raketa lundrimi. Gjatësia e avionit është rreth 44.5 metra, lartësia është 10.4 metra, distanca midis skajeve të krahëve është 41.8 metra dhe pesha e tij është më shumë se 86 ton. Kapaciteti i rezervuarit të karburantit të këtij avioni është 120.3 ton. Ekuipazhi përbëhet nga katër persona, përkatësisht piloti, bashkëpiloti dhe dy oficerë armësh.
Fillimisht ishte projektuar si një bombardues bërthamor, por është shndërruar në një bombardues jobërthamor që nga vitet 1990.
Uashingtoni planifikon ta përdorë atë pas vitit 2040 dhe disa statistika kanë treguar se ka marrë pjesë në më shumë se 12 mijë fluturime luftarake që nga viti 2001. /tesheshi.com/
