Televizioni shtetëror i Rusisë i kushtoi minutazh special parashikimit të motit në Siri, duke e lidhur atë me fushatën e bombardimeve në këtë vend.
Në emisionin e parashikimit të motit, u tha se klima e butë vjeshtore e Sirisë është perfekte për sulme ajrore.
Më 3 tetor, njofton REL, kanali televiziv i udhëhequr nga shteti, Rossiya-24, transmetoi një parashikim gjithëpërfshirës të motit, duke i përshkruar kushtet aktuale klimatike në Siri si “shumë të favorshme” për fushatën e bombardimeve.
“Tetori në Siri në përgjithësi është periudhë e përshtatshme për fluturime”, tha moderatorja e parashikimit të motit, duke qëndruar pranë diagramit ku ishin detajuar temperaturat mesatare, reshjet, shpejtësia e erës dhe numri i ditëve me re në muajin tetor, në këtë vend të Lindjes së Mesme.
“Shiu bie vetëm njëherë në 10 ditë dhe reshjet më intensive, deri në 18 milimetra, zakonisht janë vërejtur në pjesën veriore, ku po vazhdojnë operacionet nga forca ajrore e Rusisë”, ka thënë moderatorja dhe ka shpjeguar se “kjo nuk do të ndikojë seriozisht në bombardime”.
Sipas parashikimit tre minutësh, i shoqëruar me pamjet e ministrisë së Mbrojtjes ku shiheshin bombat duke e qëlluar tokën dhe duke shkaktuar re të mëdha të tymit, temperaturat e buta vjeshtore në Siri, rrjedhimisht, janë perfekte për sulme ajrore. /tesheshi.com/
