Autoritetet ruse kanë arrestuar një shkencëtar në Siberi nën dyshimin për tradhti të lartë, pasi dyshohet se ka punuar me shërbimet sekrete të Kinës.
Agjencia shtetërore e lajmeve TASS, duke cituar autoritetet rajonale dhe familjen e tij, raportoi të premten se Dmitry Kolker, një doktorant në fizikë dhe matematikë në Universitetin Shtetëror të Novosibirsk, ishte arrestuar.
Kolker, sipas faqes së tij të internetit, drejton Laboratorin e Teknologjive Optike Kuantike.
Ai raportohet se u arrestua të enjten në spitalin ku u shtrua për shkak të përkeqësimit të gjendjes së tij shëndetësore, pasi është diagnostikuar me kancer pankreatik në fazën e katërt, tha vajza e tij. Ai është në trajtim sepse “mundësitë e kimioterapisë janë ezauruar”. Sipas të afërmve të tij, ai nuk mund të hajë vetë.
Autoritetet kontrolluan dje banesën e Kolkerit. Njerëz të sigurimit e çuan atë në Moskë.
Kolker dhe Gjykata e Qarkut Sovjetik në Novosibirsk, e cila është 2,800 kilometra në lindje të Moskës, nuk iu përgjigjën një kërkese për koment mbi rastin. Avokati i Kolkerit nuk mund të kontaktohej.
Një numër shkencëtarësh rusë janë arrestuar dhe akuzuar për tradhti në vitet e fundit, pasi dyshohet se kanë kaluar materiale të ndjeshme te të huajt. Por Kritikët e Kremlinit thonë se arrestimet e bëra shpesh bazohen në pretendime paranojake të pabazuara.
Tradhtia e lartë dënohet deri në 20 vjet burg.
Agjencia TASS, duke cituar familjen e Kolkerit, shkruan se shkencëtari u akuzua për bashkëpunim me shërbimet kineze të sigurisë. Kolker më parë kishte ligjëruar në një konferencë ndërkombëtare në Kinë dhe tani është transferuar në një burg në Moskë, tha djali i tij, Maxim.
Nuk dihet se cilat janë akuzat ndaj tij. Sipas djalit të tij, Maxim Kolker, shkencëtari akuzohet se i ka dhënë Kinës informacione që përbëjnë sekret shtetëror. /tesheshi.com/
