Ushtria ruse hyn në Ballkan vetëm pak ditë kur shërbimet sekrete të këtij vendi akuzohen për komplot për të vrarë kryeministrin serb Aleksandër Vuçiç.
Më shumë se 200 forca elitare të njësisë më të famshme të trupave ruse, parashutistët, kanë mbërritur në Serbi për të kryer një stërvitje të madhe ushtarake të përbashkët me ushtrinë sebe dhe atë bjelloruse me emrin provokativ “Vëllazëria sllave 2”.
Trupat e zgjedhura janë pjesë e batalionit “Ivanovski” dhe do të zhvillojnë manovra në portën e NATO-s, përkatësisht në kufirin me Kroacinë, një nga shtetet anëtare të Aleancës Veriatlantike.
Stërvitja do të zhvillohet për dy javë nga 2 deri më 15 nëntor dhe Rusia do të dërgojë avionët Il-76MD.
Siç bën të ditur portal i financuar nga Kremlini, Sputnik, përveç avionëve në stërvitje do të përfshihen edhe mjete të blinduara dhe një dron militar nga ata që bombardojnë predha të telekomanduara.
Dhe pikërisht në këtë situatë, kur presioni politik i Moskës merr formë dhe ngjyrë ushtarake edhe mbështetësit filorusë kanë ngritur zërin.
Ivica Daçiç, zv.kryeministri serb që njihet si skifter i Moskës, deklaroi në një mbledhje të Partisë Socialiste Serbe që drejtohet nga ai, se “Europa nuk do që Serbia të ketë marrëdhënie me Rusinë për shkak të Kosovës. Ata duan të na heqin Kosovën por ne nuk dorëzohemi dhe kemi Rusinë përkrah nesh”.
Deklarata e Daçiçit ka ardhur pas një qëndrimi të ashpër të politikanit të njohur opozitar serb, Çedomir Jovanoviçit, i cili ka kërkuar që “ka ardhur kohë që Serbia të ndajë shapin nga sheqeri: o me Rusinë, ose me Bashkimin Europian”.
Daçiç i ka bërë thirrje Jovanoviqit që të mos provokojë.
“Çedo (Çedomir), të mos na sfidojë. Nëse ai do që të bëhet një referendum, besoj se të gjithë e dimë përgjigjen dhe do të fitojë Rusia. Ku jeton ai, ku punon, e di se çfarë mendon populli serb”, tha shefi i diplomacisë serbe në reagimin ndaj politikanit të opozitës.
Në mbledhjen e Komitetit Qëndror të partisë së tij me rastin e 26-vjetorit të themelimit, Daçiç tha se “Serbia ka fatin që të ketë miq Rusinë e Kinën që të vendosin veton në Këshillin e Sigurimit të OKB-së për të mos e pranuar anëtar me të drejta të plota shtetin e Kosovës”.
“Rusia po na ndihmon për Kosovën, ndërsa Çedoja na fton që të miratojmë sanksionet ndaj saj. Ai nuk po flet kundër Rusisë, por kundër Serbisë pasi bëhet fjala për të ndaluar anëtarësimin e Kosovës në OKB”, tha Daçiç i cili vazhdoi: “Perëndimi do të na ndajë nga Rusia, jo për shkak të vetë Rusisë por që të zgjidhin problemin e Kosovës më lehtësisht dhe që Moska është pengesë”. /tesheshi.com/
