Pamjet e sasive të mëdha ushqimore që shkatërrohen me buldozer, varrosen apo digjen kanë bërë përshtypje të rëndë tek qytetarët rusë, të cilët nuk e kanë harruar urinë në kohën e ish-Bashkimit Sovjetik.
Me dhjetëra mijë njerëz kanë firmosur një peticion proteste drejtuar presidentit Vladimir Putin.
Tashmë prej një viti, Rusia ka ndaluar importimin e produkteve nga vendet që i kanë vendosur asaj sanksione për shkak të aneksimit të Krimesë. Por, me një urdhër të ri, Putin ka vendosur që të gjithë ata që e shkelin këtë vendim do t’u sekuestrohen dhe shkatërrohen produktet.
Me hyrjen në fuqi të dekretit, televizioni shtetëror raportoi për shkatërrimin e ushqimeve shoqëruar me pamje të freskëta të rrotullave të djathit që shkatërroheshin me buldozer.
Media përshëndeti vendimin si luftë ndaj kontrabandës, por shumë rusë janë të shqetësuar nga ky zhvillim.
Peticioni që kërkon ndaljen e praktikës, ka mbledhur deri tani 285 mijë nënshkrime.
Kujtimet e urisë së periudhës sovjetike i bëjnë rusët vecanërisht të ndjeshëm ndaj ushqimit të shkuar dëm.
Por, jo të gjithë rusët janë të shqetësuar. Ka shumë që e përshëndesin vendimin, sikundër janë edhe grupet e vajzave aktiviste që me sloganin “Ha rusisht” zbresin në supermarkete dhe shënjojnë mallrat perëndimore. /tesheshi.com/
