Që nga fillimi i luftës në Ukrainë, numri i qytetarëve rusë që vijnë në Beograd është vazhdimisht në rritje.
Fillimisht u interesuan për pasuri të paluajtshme luksoze që merrnin me qira, por situata ka ndryshuar, shkruan portali Nova.rs.
Ata filluan të blejnë apartamente në Beograd, për të cilat janë gati të shpenzojnë më shumë se 200 mijë euro.
Siç thekson ekonomisti dhe drejtori ekzekutiv i agjencisë së pasurive të paluajtshme City Expert, Milosh Mitiç, Beogradi është një nga qytetet ballkanike që ka qenë gjithmonë “interesant” për qytetarët e huaj që duan të blejnë pasuri të paluajtshme.
Fillimisht ata morën me qira apartamente në Beograd dhe Novi Sad, dhe tani po i blejnë. Filloi në maj, e më pas kërkesa po rritej dhe arriti kulmin në qershor”, tha Mitiç, i cili pret që interesimi i rusëve në patundshmëri në kryeqytetin e Serbisë të vazhdojë.
Vetëm tre muaj më parë, agjentët e pasurive të paluajtshme vlerësuan se 95 për qind e rusëve që erdhën në Beograd donin të merrnin apartamente me qira, por situata po ndryshon.
Mitiç theksoi se rusët kryesisht paguajnë për apartamente me para në dorë, dhe se për momentin shumica janë në kërkim të apartamenteve me sipërfaqe më të vogël, por ka edhe nga ata që duan prona më të mëdha dhe të pajisura me luks.
Ai shtoi se numri i qytetarëve rusë që blenë apartamente në Beograd para luftës në Ukrainë ishte i vogël.
Ai shpjegon se si mund të dallohen qartë dy grupe rusësh që bëjnë pazar në Beograd: Grupi i parë përbëhet nga blerës që kërkojnë kryesisht apartamente më të vogla, të cilat janë më larg qendrës së qytetit, me një çmim deri në 100 mijë euro. Grupi i dytë përbëhet nga blerësit që janë më të aftë për të paguar, që preferojnë apartamentet në qendra në komplekset e banimit si Beograd na voda dhe Central Garden, ku çmimet fillojnë nga 3000 euro për metër katror, shpjegon ai, kryesisht apartamente nga 60 deri në 90 metra katrorë, me të paktën një dhomë gjumi.
Nova.rs shkruan se çmimet e pasurive të paluajtshme në Beograd prej muajsh janë në rritje të ndjeshme dhe një nga faktorët që ka ndikuar në këtë rritje ka qenë pikërisht rritja e kërkesës, në të cilën kanë ndikuar edhe qytetarët rusë. /tesheshi.com/
