CSKA e Moskës karshi Crvena Zvezdës qe përcaktuar si ndeshja e javës në Euroleague, sa për faktin se skuadra serbe kishte fituar në takimin e mëhershme midis tyre, aq dhe për përballjen mes sulmit më të mirë dhe mbrojtjes më të mirë të aktivitetit.
Për javën e 15 të sezonit të rregullt, më 29 dhjetor të vitit të shkuar, Crvena Zvezda fitonte 78-67 ndaj CSKA-së në Beograd; një histori që nuk pati asnjë mundësi të përsëritej përsëri pak javë më vonë.
Në “Megasport Arena”, në prani të pak më tepër se 9.000 ndjekësve të basketbollit, CSKA-ja e Moskës e zotëroi tërë lojën, duke fituar 102-80. Udhëtuesit nuk ia dolën në asnjë prej pjesëve dhjetëminutëshe të kryesonin, ndërkohë që vetëm në tretën prej tyre diferenca qe minimale, por gjithsesi në favor të rusëve.
Nando De Colo qe shënuesi më i mirë i CSKA-së, por dhe i tërë ndeshjes, me 25 pikë të realizuara. Kurbanov dhe Teodosic realizuan përkatësisht 18 dhe 16 pikë për vendasit; për serbët, më i mirë si shënues qe Luka Mitrovic, me 16 pikë.
Me këtë rezultat të javës së 22, CSKA-ja mban vendin e dytë në renditje, me 16 fitore e 6 humbje. Crvena Zvezda renditet e gjashta, me 12 fitore e 10 humbje.
Nga takimet e tjera të së enjtes, duhet veçuar fitorja e ngushtë në fushë kundërshtare e kryesuesve të Realit të Madridit, 77-81, ndaj Uniks Kazanit. /tesheshi.com/
