Ushtria ukrainase njoftoi në rrjetet sociale se kishte vrarë gjeneralin e pestë të ushtrisë ruse.
“Si pasojë e sulmit ndaj armikut, u vra komandanti i Ushtrisë së 8-të të Qarkut Ushtarak Jugor të Forcave të Armatosura të Federatës Ruse, gjeneral kolonel Andrei Mordivchev”.
Ky është gjenerali i pestë rus që, sipas ukrainasve, vdiq në pak më shumë se 20 ditë lufte.
I pari u regjistrua më 3 mars. Ai ishte gjenerali Andrei Sukhovetsky, 47 vjeç, zëvendës komandant i Ushtrisë së Kombinuar të 41-të dhe një ish-komandant i Divizionit të 7-të Ajror të Forcave Ajrore Ruse (forcat ajrore elitare).
I dyti qe gjenerali Vitaly Gerasimov, 44 vjeç, Shefi i Shtabit dhe Zëvendës Komandanti i Parë i Ushtrisë së Kombinuar të 41-të të Qarkut Qendror Ushtarak të Rusisë. Para pushtimit të Ukrainës, ai mori pjesë në luftën në Siri, në pushtimin e Krimesë – për të cilën mori një çmim – si dhe në Luftën e Dytë çeçene.
I treti, gjenerali Andrei Kolesnikov, 45 vjeç, komandant i Ushtrisë së 29-të të Distriktit Lindor Rus, u vra në një betejë më 11 mars në një vend të panjohur në Ukrainë, i njoftuar fillimisht nga autoritetet ukrainase dhe më vonë i konfirmuar nga zyrtarët perëndimorë.
I katërti është gjeneralmajor Oleg Mitjajev, 47 vjeç, i cili u vra pranë Mariupol të martën. /tesheshi.com/
