Mihail Gorbaçov, udhëheqësi i Bashkimit Sovjetik në fund të viteve ’80 dhe në fillim të viteve ’90 të shekullit të shkuar, mbushi dje 85 vjeç, por ende rusët kanë pikëpamje krejt të kundërta mbi rolin e tij.
Siç bën të ditur Russia Today, agjencia shtetërore VTSIOM publikoi dje përfundimet e një anketimi mes rusëve mbi figurën e Gorbaçovit.
Kështu, gjysma e rusëve mendojnë se Gorbaçovi nuk ka bërë asgjë të mirë për vendin e tij, e gjysma tjetër është e mendimit se ai ka patur qëllime të mira, por ka kryer gabime të rënda ndërsa ka kërkuar t’i materializojë synimet e veta.
Anketimi tregon se 46 për qind e publikut rus ka opinionin se shqetësimi kryesor i Gorbaçovit ishte e mira e vendit të tij, veçse gabimet e tij serioze çuan në shpërbërjen e Bashkimit Sovjetik. 24 për qind e të anketuarve e kanë cilësuar atë “një kriminel që qëllimisht e shkatërroi vendin e madh”, kurse vetëm 12 për qind e kanë quajtur “një njeri të vendosur dhe me kurajë që bëri aq sa mundi për vendin e tij”.
Në lidhje me atë se ç’konsideronin më të rëndësishme prej arritjeve të Gorbaçovit, 47 për qind e të
anketuarve janë shprehur se nuk mund ta lidhnin ndonjë arritje me qeverisjen e udhdëheqësit të fundit sovjetik. 34 për qind e kanë gjetur pyetjen të vështirë për t’i kthyer përgjigje, gjashtë përqind do ta ngrinin lart rolin e Gorbaçovit në dhënien fund Luftës së Ftohtë, e pesë për qind kanë vlerësuar se Rusia i detyrohej atij për liritë demokratike.
Negative ndaj figurës së tij kanë qenë përgjithësisht përgjigjet në lidhjet me reformat që ai kreu. 36 për qind e të përgjigjurve kanë deklaruar se kolapsi i Bashkimit Sovjetik ka për fajtor kryesor Gorbaçovin. Dhjetë për qind prej tyre qenë të mendimit se reformat çuan në rënie të ekonomisë dhe të aftësisë mbrojtëse të vendit, e pesë për qind do ta përshkruanin fillimin e Perestrojkës si një proces negativ të nisur nga Gorbaçovi.
Vetë Mihail Gorbaçovi u tha këtë të hënë gazetarëve se ai u qëndronte besnik idealeve të Perestrojkës e se ende mendonte që kishte bërë zgjedhjen e duhur kur kishte vendosur ta reformonte Bashkimin Sovjetik. /tesheshi.com/
