Ukrainasit njoftuan se kishin vrarë kolonelin Alexei Sharov, komandantin e Brigadës së Veçantë të Gardës 810 Zhukov në marinsat ruse, në Mariupol. Lajmi është publikuar nga mediat vendase, të cilat e kanë transmetuar njoftimin nga Telegrami i zëdhënësit të ushtrisë nga Odessa, Sergei Bratchuk, dhe që është transmetuar nga tabloidet britanike.
“Komandanti i Brigadës së Marinës Ruse u likuidua nga ushtria jonë. Dhe kështu do të jetë me këdo që përpiqet të vrasë fëmijët tanë. Nuk do t’i falim”, ka shkruar Bratchuk. Një oficer i ushtrisë ukrainase, Anatoliy Stefan, gjithashtu ka postuar në Tëitter për vdekjen e gjeneralit rus.
Daily Mail shkruan se ky është koloneli i 5-të dhe komandanti i 15-të suprem që rusët kanë humbur që nga fillimi i pushtimit. Këto janë humbjet e tyre më të mëdha ushtarake që nga Lufta e Dytë Botërore.
Tjetër vdekje e bujshme është ajo e parashutistit Georgy Dudorov, zëvendës komandanti i njësisë së zbulimit të Divizionit Ajror Tula. Siç njoftoi Komiteti Hetues i Federatës Ruse, ai u vra në agresionin rus kundër Ukrainës.
Georgiy ishte djali 23-vjeçar i zv.guvernatorit të Qarkut Autonom të Nenets, konfirmoi për RIA Novosti menaxhmenti i NAO për mediat shtetërore.
“Georgy Alexandrovich Dudorov ishte zëvendëskomandanti i njësisë së zbulimit për punën ushtarako-politike të Regjimentit 137 të Divizionit Ajror 106 të Gardës Tula. Siç u njoftua më parë, më 6 mars 2022, një kolonë e njësisë së tij u sulmua nga njësitë ukrainase. Jeta e tij ndëpritet tragjikisht.
Punonjësit e departamentit vajtojnë sinqerisht të afërmit dhe miqtë e Georgy Alexandrovich dhe janë të gatshëm t’i mbështesin jo vetëm me fjalë, por edhe me vepra”, thuhet ndër të tjera në faqen e Komitetit Hetimor.
Sipas mediave lokale, parashutisti 23-vjeçar ka lënë pas gruan dhe djalin pesë muajsh. /tesheshi.com/
