Marina ruse dhe ajo kineze po kryejnë patrulla të përbashkëta në Oqeanin Paqësor, tha të enjten Ministria ruse e Mbrojtjes, duke thelluar lidhjet ushtarake dhe diplomatike midis Moskës dhe Pekinit, ndërsa marrëdhëniet e tyre me vendet perëndimore janë përkeqësuar.
Në një deklaratë të Ministrisë ruse në Telegram, thuhet se ekuipazhet e të dyja palëve janë duke kryer stërvitje të përbashkëta taktike me artileri dhe helikopterë.
“Detyra e patrullave të lartpërmendura është të forcojnë bashkëpunimin detar midis Rusisë dhe Kinës, të ruajnë paqen dhe stabilitetin në rajonin e Azi-Paqësorit, të monitorojnë brigjet dhe të mbrojnë objektet ekonomike detare të dy vendeve”, shtohet në deklaratë.
Presidenti kinez X Jinping do të takohet me homologun e tij rus Vladimir Putin të enjten në Uzbekistan për të diskutuar situatën në Ukrainë dhe Tajvan. Ky do të jetë takimi i parë i huaj i liderit kinez në dy vitet e fundit.
Forcimi i partneritetit “të pandalshëm” midis superfuqisë në rritje të Kinës dhe vendit të pasur me burime natyrore, Rusisë, përfaqëson një zhvillim gjeopolitik që kundërshtohet nga fuqitë perëndimore.
Luftanijet ruse dhe kineze kryen patrullimet e para të përbashkëta në tetorin e vitit të kaluar, në pjesën perëndimore të Oqeanit Paqësor, gjë që nuk kaloi pa u vënë re nga Japonia, e cila i quajti manovrat e tyre “të pazakonta”. /tesheshi.com/
