Oana Glasu është rumune dhe jeton e punon në Bukuresht. Por ajo ka një lidhje të fortë me Shqipërinë. Ka studiuar gjuhë dhe letërsi shqipe në Tiranë për 5 vjet dhe për të është bërë atdheu i dytë.
Madje gjatë ndeshjes mes dy vendeve në Europianin 2016 zgjodhi t’a vishte djalin e saj me bluzën kuq e zi. E flet shqipen shumë bukur dhe ka plot miq në Tiranë. Këto ditë kur Rumania është përshirë nga protestat qytetare kundër një vendimi të qeverisë për të zbutur dënimet anti-korrupsion, në facebook-un e saj sheh çdo ditë video dhe foto nga protesta. Në një intervistë për tesheshi.com, Oana analizon atë çfarë po ndodh në Rumani dhe a mund të ketë një paralelizim me Shqipërinë, ku po synohet reforma në Drejtësi.
“Rumania ka regjistruar hapa të rëndësishëm në luftën kundër korrupsionit, është realitet tek ne, por duhet të vazhdojë dhe ne ta mbështesim dhe ta mbrojmë. Kjo duhet të ndodhë dhe në Shqipëri”, thotë Oana. E pyetur se sa ngjashmëri ka protesta që po organizon opozita shqiptare me atë rumune ajo thotë se nuk është shumë në dijeni, por ajo që po ndodh në Rumani është një lëvizje e madhe qytetare, pa i thirrur asnjë parti politike. Ajo shpreson se dhe populli shqiptar do të dijë ta mbrojë këtë reformë në Drejtësi dhe të mos lejojë që të abuzohet nga pushtetarët më në të ardhmen.
Oana, çfarë po ndodh në Rumani në syrin tuaj? Pse po protestoni?
Protesta është pjesë e çdo demokracie në botë, sidomos të atyre që duan të konsolidohen. Në zgjedjet e fundit, me 11 dhjetor, në Rumani, Partia Social-Demokratike ka fituar me një rezultat shumë të mirë dhe ka bërë mazhorancën në parlament. Qeveria, gjithashtu është formuar prej PSD-së dhe programi i propozuar rumunëve në fushatë ishte shumë i mirë. Por, më datë 31 janar, qeveria dha një urdhër urgjent që flet për disa aspekte juridike të kodit penal, të cilat ata donin t’i modifikojnë, gjë që nuk u pranua nga populli, jo vetëm nga opozita, sepse u interpretua si shpejtësi veprimi e qeverisë dhe e PSD-së; sepse brenda strukturës së partisë ka disa antarë me probleme penale, korrupsioni, dhe ky urdhër qeverie do të bënte të mundur që ata t’i shpëtojnë drejtësisë. Pastaj, mënyra se si u bë, natën, pa konsultimet e domosdoshme me të gjithë aktorët politikë dhe nga shoqëria civile. Shkurt, këto janë arsyet për të cilat që nga ajo natë, përpara godinës së qeverisë kanë dalë shumë njerëz, natë për natë, ku numri arriti deri tek shifra 600.000 në të gjithë Rumaninë, të dielën që kaloi.
Po qeveria reagoi apo jo, ministri i Drejtësisë dha dorëheqjen?
Qeveria rumune ka kuptuar mesazhin e protestës dhe ka bërë një hap prapa, duke tërhequr ligjin për ridiskutim, vetëm se njerëzit duket se nuk mjaftohen me aq pak dhe vazhdojnë protestat. Nga pikëpamja ime, tashmë asistojmë në një radikalizim të situatës sepse duan rrëzimin e qeverisë, gjë që nuk është normale dhe as unë nuk e pranoj. PSD ka fituar, është me legjitimitet në pushtet dhe duhet të qeverisë për të plotësuar të gjitha pikat e premtuara. Një pjesë e shtypit rumun thotë se protestat duken disi si të organizuara nga forca sorosiste, nga forca që duan destabilizimin e vendit, por nuk e di, sepse një gjë është e qartë: 600.000 njerëz nuk ka si t’i organizosh apo t’i paguash.
Rumania ka një traditë të protestave nëpërmjet të cilave edhe rrëzon regjime apo qeveri, por kësaj radhe ndihet ai shpirti i civilizimit që ka rilindur nëçdo pjestar në protestë. Shtypi rumun e ka quajtur revolucioni i bardhë nga ai spektakli i dritave të telefonave të ndezur njëkohesisht në orën 21.00, të dielën, në të gjithë Rumaninë ku protestohej. Ja pra, ky është organizim ekzemplar i të rinjve që flasin në kohë reale në rrjetet sociale.
Së fundmi partia në opozitë, PD-ja, po u kërkon njerëzve të dalin në protestë kundër qeverisë duke u krahasuar me Rumaninë. A mendon se ka vend për krahasim?
Unë nuk jam në dijeni, ose nuk jam shumë e lidhur më me realitetin shqiptar dhe në asnjë mënyrë nuk do më lejohej që të jap mësime shtetit apo popullit shqiptar në ndonjë drejtim, por mendoj që shumë gjëra ndihen. Njeriu ka vetë kapacitetin e reagimit ndaj situatave që nuk shkojnë mbarë. Nuk ka nevojë të thërrasë partia X apo Y. Ne si shtete balkanase, me aspirata për t’u futur në familjen e demokracive të mëdha të Evropës duhet të dimë të mbrojmë vlerat për të cilat secili prej nesh ka bërë sacrifica. Në fushën e drejtësisë, në luftën kundër korrupsionit nuk duhet të bëjmëlëshime, sepse vëmë në rrezik të ardhmen tonë dhe të fëmijëve tanë. Demokracia dhe bota e lirë ka në bazë këto parime dhe duhet t’i respektojmëqëtë arrijmë aty kue kemi vendin.
Rumania ka regjistruar hapa të rëndësishëm në luftën kundër korrupsionit, është realitet tek ne, por duhet të vazhdojë dhe ne ta mbështesim dhe ta mbrojmë. Kjo duhet të ndodhë dhe në Shqipëri. /tesheshi.com/
