Rumunët sfidojnë të ftohtin dhe dalin sërish në rrugë në ditën e 13-të të protestave

Mijëra protestues mbushën mbrëmë përsëri rrugët e Bukureshtit pavarësisht temperaturave të ulëta, nën zero gradë.

Ata kërkuan sërish dorëheqjen e qeverisë, me thirrjet, “Hajdutë, dorëhiquni”.

Sipas mediave lokale, më së paku 60.000 njerëz morën pjesë në protestën e së dielës, ku përmes ndriçimit të telefonave mbizotëruan dhe ngjyrat e flamurit rumun. Protesta të ngjashme pati dhe në qytete të tjera krahas kryeqytetit.

Të nisura gjatë janarit, protestat kanë vijuar edhe pse qeveria u tërhoq nga dekreti i shumëkundërshtuar për veprat korruptive dhe dënimet për to. Valën e protestës nuk e dobësoi as dorëheqja të enjten e shkuar e ministrit të Drejtësisë, Florin Iordache.

Në më të mëdhatë protesta që nga rënia e komunizmit, dorëheqja e këtij zyrtari të lartë është parë e pamjaftueshme, ndërsa kërkohet dorëheqja e tërë qeverisë së kryeministrit Sorin Grindeanu. /tesheshi.com/