Rumania, kundërshtarja e Shqipërisë në Euro 2016, ka treguar edhe një herë se armën e saj më të fortë e ka mbrojtjen. Në miqësoren ndaj Spanjës, të luajtur në “Cluj Arena”, rumunët ia dolën ta mbajnë sërish të paprekur portën, ashtu siç bënë shpesh në fazën eliminatore, kur pësuan vetëm dy gola.
Përndryshe, Del Boske, trajneri i Spanjës, kishte bërë dhjetë ndryshime nga miqësorja me Italinë, duke nisur së pari me portën, ku ndaj Rumanisë luajti Kasijasi.
Ky bëri një paraqitje të patëmetë mbrëmë, e gjithashtu e shpëtoi portën e tij në disa raste të pastra. Me 166 ndeshje ndërkombëtare me përfaqësuesen, Kasijasi ende nuk dihet në do të jetë zgjedhje e parë e teknikut spanjoll gjatë kampionatit europian, me De Gean më në avantazh.
Edhe pse spanjollët e mbizotëruan lojën, nuk arritën të shënonin, duke marrë barazimin e dytë në dy takime miqësore. Sidoqoftë, formacioni i mbrëmshëm ishte shumë eksperimental, ndryshe miqësores ndaj Italisë të enjten e shkuar.
Me barazimin 0-0, Rumania e çoi në shtatëmbëdhjetë numrin e ndeshjeve të pahumbura, duke dërguar sinjale se do të jetë një kundërshtar i fortë për çdo ekip në Francë. /tesheshi.com/
