Kryeministri rumun, Viktor Ponta nuk mund të qeverisë më Rumaninë e këtë e thonë jo vetëm presidenti dhe opozita, por edhe vetë përfaqësuesit e partisë së tij. Mirëpo, në votimin në parlament, ai i ka mbijetuar mocionit të mosbesimit, pasi si thonë analistët, aty mbretëron një disiplinë e fortë partiake për shkak të ruajtjes së pushtetit.
Rumania, thotë DW në një analizë për vendin më të varfër të unionit, është i vetmi vend i BE-së ku zhvillohet një proces gjyqësor kundër një kryeministri në detyrë. Por, Ponta i ka refuzuar të gjitha kërkesat për dorëheqje.
“Dëmi në imazh për vendin e tij duket se atë nuk e preokupon, megjithëse lista me shkeljet e tij ndërkohë është e konsiderueshme. As kopjimi i vërtetuar i doktoraturës, as sulmet e përsëritura kundër drejtësisë dhe shtetit juridik dhe as kritikat aktuale të Prokurorisë nuk mundën ta shtyjnë atë të ndërmarrë hapin moral të nevojshëm prej kohësh”, shkruan DË.
Kështu që loja me kryeministrin e kompromentuar kalon në raundin tjetër, atë të veprimeve konkrete. Më 11 tetor, partia e Pontës do të zgjedhë një kryetar të ri. Një javë më pas, në një kongres të jashtëzakonshëm partie do të vendosen pastaj piketat për një fillim të ri. “Procesi duket i paramanipuluar: socialdemokratët dhe para së gjithash partnerët e tyre të vegjël të koalicionit nuk donin të lejonin që Ponta të rrëzohej, për të mos qenë të detyruar që t’ia përcjellin funksionet qeveritare opozitës liberale. Në vend të kësaj, pas kongresit të saj PSD do të propozojë një kryeministër të ri, i cili do të emërohet pastaj nga Presidenti dhe do të konfirmohet në post nga shumica parlamentare”.
Në peisazhin politik të Rumanisë, sipas analistëve, duhet të ndodhë më në fund një shkundje. Dhe kjo shkundje mund të vijë vetëm nga presidenti. Zgjedhësit presin nga Klaus Iohannis, që ta vërë në jetë vizionin e tij të një politike të ndryshme. Pritet që kjo të jetë një lindje e vështirë. por tani, nëntë muaj pas ardhjes së tij në pushtet koha përfundimisht ka ardhur. /tesheshi.com/
