Rumania përmbylli gjyqin e parë për krime kundër njerëzimit, të kryera në periudhën komuniste, duke dënuar me 20 vjet burg ish-shefin e një prej burgjeve më famëkeqe të komunizmit.
89-vjeçari Alexandru Visinescu drejtonte burgun famëkeq Ramnicu Sarat në vitet 1956-1963, në të cilin të dënuarit torturoheshin sistematikisht dhe vuanin nga uria. Të paktën 12 persona besohet se kanë humbur jetën nga abuzimet aty.
Visinescu i ka mohuar akuzat ndaj tij, duke thënë se ai thjesht zbatonte urdhërat.
Prokuroria kërkoi 25 vjet burg, duke argumentuar se Visinescu ushtroi një regjim shfarosjeje në burgun Ramnicu Sarat, në lindje të vendit.
Burgu kishte marrë emrin “Burgu i heshtjes” për shkak se të dënuarit mbaheshin në izolim. Në të mbaheshin intelektualë, disidentë, priftërinj dhe persona të tjetër të cilësuar armiq të partisë Komuniste.
Gjyqi për Visinescu-n nisi në shtator. Ai është i pari ish-komandat burgu që dënohet në Rumani për abuzime me të burgosurit në sistemin gjyqësor të kohës së komunizmit.
Më shumë se gjysmë milioni rumunë mbaheshin të burgosur politikë në vitet ’50 kur Qeveria kërkoi të shtypte disidencën që po formësohej kundër regjimit.
Një raport zyrtar i vitit 2006 thotë se 500 mijë deri në 2 milionë njerëz janë vrarë e persekutuar nga autoritetet komuniste.
Lideri komunist i vendit, Nicolae Ceausescu u rrëzua me kryengritje popullore dhe u ekzekutua në trazirat e përgjakshme të dhjetorit 1989./tesheshi/
