Në 34-vjetorin e miratimit të Kushtetutës së Kaçanikut, jo aty por në Llap, është zbuluar shtatorja e ish-presidentit të ndjerë Ibrahim Rugova. Përveç qytetarëve të shumtë, në zbulimin e kësaj shtatore në Podujevë morën pjesë edhe krerët e shtetit.
Presidentja e Osmani potencoi Rugovën si arkitekt të shtetit, duke thënë se ai po i kthehet Llapit në bronz, duke u bërë “banor i përjetshëm” të kësaj komune. Osmani tha se Kushtetuta e Kaçanikut është një moment historik në udhëtimin e Kosovës drejt lirisë.
Ndaj sipas saj, shtatorja nuk është vetëm një vepër arti, por edhe një testament i idealeve për të cilat Rugova sipas saj punoi deri vdekje për një Kosovë të lirë dhe demokratike.
Nga ana tjetër, ministrja e Jashtme Donika Gërvalla tha se ish-presidenti Rugova i qëndroi besnik parimeve gjatë viteve të 90-ta, gjatë luftës por edhe pasi Kosova ishte çliruar. Ajo shtoi se vizioni i qartë, mençuria, thellësia e mendimeve dhe këmbëngulja e Rugovës bëri që populli i Kosovës të shpëtojë nga një rivalitet i egër politik për zhbërjen e shtetësisë së vendit tonë.
Ish-presidenti Fatmir Sejdiu tha se me kulturën dhe imazhin e tij civilizues, presidenti Rugova u bë frymëzim për shqiptarët.
Kryetari i Podujevës, Shpejtim Bulliqi, tha se zbulimi i shtatores së Rugovës është një kujtim i përjetshëm për njeriun që me urtësi, qëndresë dhe vizion udhëhoqi Kosovën drejt lirisë dhe pavarësisë.
Shtatorja ështëb punuar nga e njëjta dorë që punoi dhe Skënderbeun e ngjashëm me Ramën, Gëzim Muriqi. Sigurisht, Rugova në këtë rast ngjante vetëm me Rugovën dhe jo fjala vjen me Albin Kurtin. /tesheshi.com/
