E enjta e 15 tetorit ka qenë e trazuar për një pjesë banorësh e fshatrave përreth, aq sa është menduar se po plas sërish, si ato ditë maji; kjo pasi forca të shumta policore kanë mësyrë në fshatrat përreth, por dhe në disa lagje të brendshme, përfshirë dhe atë të “Trimave”, duke arrestuar 7 persona, pa dyshim shqiptarë, si të dyshuar për implikim në ngjarjet e majit. Më konkretisht aksoni është shtrirë më së shumti në Likovë për të përfunduar në Brezë.
Sipas informatave të zëdhënësit të MPB-së, Ivo Kotevski, policia ka ndaluar 7 persona në aksionin policor “Rrufeja” për të cilët dyshon se kanë ndihmuar grupin e Kumanovës. Sipas policisë, personat e ndaluar nuk kanë qenë pjesë e grupit dhe luftimeve në “Lagjen e Trimave”, por në mënyra të ndryshme kanë ndihmuar qarkullimin dhe vendosjen e tyre në Kumanovë si dhe në aksionin e Gushincës. Madje zëdhënësi i MPB-së Ivo Kotevski, pohon se njëri prej të arrestuarve kishte pasur plan të rekrutonte djem të rinj që do të ndërmerrnin sulme në Shkup, teksa zhvilloheshin luftimet në Kumanovë, në mënyrë që të policia të shpërqëndrohej.
“Të dyshuarit kryesisht kanë pasur rolin e logjistikës, pra në të dy rastet e kanë ndihmuar grupin gjatë ekzekutimit të planit me mbulimit të tij. Përveç ndihmës, njëri prej grupit ka tentuar të rekrutojë një grup të vogël njerëzish të rinj, me të cilët do të zhvillonte sulme në Shkup gjatë aksionit të Kumanovës, në mënyrë që të shpërqendronte policinë dhe të zvogëlonte forcën e saj. Bëhet fjalë për 7 persona të moshës nga 20 deri 74 vjeçarë, prej të cilëve 3 janë nga Hotla, 3 nga fshati Brezë, nga një të Haraçinës dhe Mateçit. Të shtatë personat dyshohen për disa vepra penale me në qendër terrorizmin”, tha Ivo Kotevski, zëdhënës i policisë.
Policia e cilësoi aksionin si të suksesshëm dhe pa incidente, duke mos komentuar informatat se ka pasur të shtëna gjatë ditës.
“Aksioni policor është zhvilluar shpejtë në mënyrë efikase dhe profesionale dhe nuk janë regjistruar incidente”, u shpreh Kotevski.
Ai bëri me dije se gjatë bastisjeve në 5 lokacione në Hotël, Brezë dhe Mateç, policia gjeti 2 pushkë gjuetie, një automatik, pistoletë gazi, fishekë, zbulues metali, harta, pranga, uniforma dhe fotografi të UÇK-së.
Ndaj të arrestuarve janë ngritur tashmë paditë penale kurse Prokuroria Publike ka propozuar masën e paraburgimit për të gjithë të arrestuarit.
Në mesin e të arrestuarve ka qenë edhe Ibrahim Murtezani, i njohur si “Komandant Haraçina”. Këtë informacion për gazetën “Lajm” e kanë konfirmuar edhe familjarë të Murtezanit, i cili është për më tepër është invalid dhe lëviz me karrocë.
Mirëpo sipas po të njëjtit burim, Ibrahim Murtezani pas bisedave informative lidhur me ngjarjet e fundit në “Lagjen e Trimave” në Kumanovë, tani është liruar.
Mediat maqedonase kanë njoftuar se qëllimi i aksionit policor ka qenë arrestimi i bashkëpunëtorëve të “Grupit të Kumanovës”, mirëpo në opinion menjëherë kanë lindur dyshime se në fakt bëhet fjalë për aksion që ka për qëllim bllokim të negociatave mes partive politike.
Lëvizja BESA ka shprehur shqetësimin dhe brengën e saj për këtë gjendje të krijuar dhe e dënon ashpër këtë aksion, ku gjithnjë shqiptarët dalin fajtorë:
“Për Lëvizjen BESA është indikativ fakti që ky aksion vijon në kushte të bllokadës së bisedimeve për implementimin e Marrëveshjes së Përzhinos dhe i shërben më së miri defokusimit të opinionit nga ngërçi politik që mbretëron në vend. Ndërkaq, sipas një tradite të kultivuar tashmë, sa herë që shteti ka nevojë për zhvendosjen e vëmendjes së opinionit, mjeti më i mirë janë çdoherë shqiptarët. Duke dyshuar se edhe ky aksion është në këtë frymë, Lëvizja BESA kërkon nga autoritetet që mos t’i hedhin zjarrit benzinë dhe ashtu të përsërisin skena, plagët e të cilave akoma nuk janë tharë”, thuhet në reagimin e Lëvizjes BESA.
Për këtë arsye, ata kërkojnë edhe nga faktorët ndërkombëtarë në vend që me kapacitetet e tyre të ndihmojnë në parandalimin e incidenteve të këtilla, që sigurisht shkojnë në dëm të bashkëjetesës së komuniteteve në Maqedoni, por edhe në dëm të ardhmërisë euro-integruese të vendit. /tesheshi.com/
