Që prej viteve 80’, në qytetin italian të Ostanës nuk ishte regjistruar as edhe një lindje e vetme. Por, javën e kaluar ndodhi realizimi i një ëndrre, ashtu si edhe e përshkroi krybashkiaku i qytetit të vogël. Një foshnje lindi. E para në 28 vjet.
Sipas gazetës italiane “La Stampa”, qyteti ka vetëm 85 banorë, ku përfshihet edhe bebja i sapolindur, Pablo. Popullsia e tij ka njohur rënie të pandërprerë – një fat i përbashkët me shumë qytete e fshatra të tjerë italianë.
“Rënia e madhe filloi në vitin 1975, pasi midis viteve 1976 dhe 1987, kur lindi dhe djali i fundit, lindën vetëm 17 foshnje – derisa në jetë erdhi Pablo”, shpjegon kryebashkiaku Giacomo Lombardo. Një festë e madhe do të jepet për të inkurajuar atë që ai shpreson të jetë nisja e ndryshimit të trendit të lindjeve në qytet.
Por, rënia e popullsisë do të jetë e vështirë të ndalet, pavarësisht ideve që mund të sajojë kryebashkiaku Lombardo. Të rinjtë italianë në veçanti thonë se ka shumë pak perspektivë tërheqëse punësimi në zonat rurale. Shumë prej tyre janë larguar drejt qyteteve, duke lënë pas vendlindjen e populluar tashmë vetëm nga të moshuarit. Ostana që ndodhet në veri të Italisë, tashmë ka vetëm një dyqan, një bar dhe dy restorante, sipas një gazette lokale.
Disa pjesë të veriut të Italisë janë goditur më rëndë se të tjerat nga rrudhja e popullsisë. Por, jugu ku përfshihet edhe ishulli i Siçilisë, është përballur me ndryshimet më dramatike demografike në dekadat e fundit.
Po të shohësh hartën e trendit demografik në gjithë Europën, midis viteve 2011 e 2011, duket qartë se ka zona që kanë pësuar rënie drastike të popullsisë e të tjera që janë rritur krahasimisht me ato. Jugu i Italisë është më shumë me ngjyrë kafe që tregon rënie, ndërsa ngjyra jeshile tregon rritje të popullsisë. Ngjyra e bardhë shënon zonat që kanë mbetur me popullsi të njëjtë.
Reagimet për këto ndryshime kohë pas kohe, janë nën shenjën e panikut. Një nga këto masa është përshembull një rregull në një qytet italian, që së fundmi e bëri të detyrueshëm kontrollin shëndetësor për banorët e tij. Qëllimi që kishte kjo nismë: ngadalësimi i nivelit të vdekjeve për ta mbajtur gjallë qytetin. Skeptikët në atë kohë bënë shaka duke thënë se ideja i përafrohej rregullit që e bën vdekjen të paligjshme.
Vitin që kaloi, Gangi, një qytet në ishullin e Siçilisë kishte një tjetër ide: këshilli bashkiak vendosi të shesë rreth 20 shtëpi të qytetit për më pak se dy dollarë. Të paktën 50 persona aplikuan për mundësinë që jepej, por kishte sigurisht edhe një kusht nga pas: blerësit duhet të dakordësoheshin për rinovimin e pronave. Edhe pse Gangi ende ka rreth 7 mijë banorë, drejtuesit e qytetit druhen se aim und të përballet me të njëjtën rënie si Ostana.
Mbërritja e shumëpritur e bebes Pablo sigurisht që është mirëpritur në Ostana, sipas kryebashkiakut. “Eshtë madhështore që më në fund të kemi një të sapolindur këtu e kjo tregon se përpjekjet tona për të ndryshuar trendin e rënies së popullsisë po funksionojnë, edhe pse ngadalë”, citohet Lombardo nga shtypi italian.
Lombardo është përpjekur të krijojë vende pune për të ndaluar të rinjtë e tjerë të largohen nga qyteti. Pablo mund të jetë treguesi i parë se strategjia e tij po funksionon. Prindërit e foshnjes dëshironin të largoheshin disa vjet më parë, por qëndruan pasi iu ofrua mundësia për të punuar në një strehë malore. Përgatiti: Juli Prifti – /tesheshi.com/
