Elvs Rroshi, kreu i shkarkuar i Bashkis së Kavajës nga KQZ, nuk ka mundur dot të përfitojë anullim vendimi nga Gjykata Kushtetuese.
Ai, nëpërmjet avokatit Theodhori Sollaku, kishte bërë ankimim në këtë gjykatë, por vendimi nuk ka qenë fatlum për të. Pra, Rroshi mbetet i shkarkuar nga detyra.
Prej javësh opozita ia tregon me gisht mazhorancës faktin që Rroshi ende vijon të ushtrojë detyrën e kryebashkiakut.
Emri i tij është bërë simbol i betejave opozitare me temë dekriminalizimin. Rroshi ka rezultuar me vepra penale në disa shtete, vite më parë kur ka qenë emigrant, si dhe me ndërrim emrash në dokumenta zyrtare.
Por rrjedha e tij politike është mjaft interesante. Ish-eksponent i PD-së në Kavajë, ai kalon tek PS dhe duke kandiduar në emër të kësaj partie arrin të fitojë për herë të parë në 25 vite Kavajën, qytet i njohur si bastion i së djathtës. Për gati 3 vjet, nga PD nuk ka pati asnjë ankesë ndaj tij.
Ajo e gëlltiti humbjen e Kavajës pa nxjerrë asnjë pretendim. Por pas humbjes së zgjedhjeve të përgjithshme të 23 qershorit, nisi ta vendoste në shënjestër ish-njeriun e saj si element me të kaluar kriminale. /tesheshi.com/
