Sezoni debutues për teknikun italian Carlo Ancelotti nuk do të ketë vend për shumë mburrje pas një serie rezultatesh negative të ditëve të fundit, prej nga janë tkurrur dhe objektivat sezonalë të bavarezëve.
Nëse në fillim të javës së shkuar, Bajerni i Mynihut gjendej në garë në tre aktivitete të ndryshme, tani ka mbetur vetëm Bundesliga, trofeu i së cilës duket gjithsesi mjaft pranë.
Bajerni eliminohej më 18 prill në çerekfinalet e Champions League-s pas një humbjeje 4-2 në shtesa ndaj Realit.
Vetëm pak më tepër se një javë më vonë, vjen dhe eliminimi në gjysmëfinalet e Kupës së Gjermanisë.
E nëse sezonin e shkuar përballja me Borusian e Dortmundit ishte në finale të kësaj veprimtarie, të fituar pas një barazimi pa gola e pas gjuajtjeve të 11-metërshave, këtë herë ajo ishte më shpejt, në gjysmëfinale.
Zhvillimi i ndeshjes në “Allianz Arena” i favorizonte të zotët e shtëpisë, që nuk mundën ta shfrytëzonin këtë. Borusia do të fitonte 2-3, për të shkuar kështu në finale, ku do të ndeshet me Eintrahtin e Frankfurtit.
Për ironi, fitorja e fundit e Bajernit të Mynihut gjatë kësaj periudhe është pikërisht ndaj Borusias së Dortmundit: 4-1 në Bundesligë më 8 prill. Për të vijuar më pas me rezultate jopozitive, që nga dy humbjet me Realin, te dy barazimet në kampionat, me Leverkusenin dhe me Mainzin, e te humbja e mbrëmshme. /tesheshi.com/
