Për herë të parë, SHBA kanë lëshuar një kritikë ndaj një pjese të medias në Shqipëri, me përdorur shprehjen e njohur shqiptare “shkel e shko”. Sipas përfaqësisë së Uashingtonit në Tiranë, një gazetari e tillë mundet të deformojë faktet si në rastin e Rrjetit 5G.
“Faktet kanë rëndësi. “Gazetaria” shkel e shko dhe çorientuese, që synon të shtrembërojë politikën e Shteteve të Bashkuara të Amerikës për rrjetin 5G, nuk e ndryshon të vërtetën. Faktet janë këto: Shtetet e Bashkuara e mbështesin qasjen e matur dhe të përgjegjshme të Shqipërisë për rrjetin 5G. E Ngarkuara me Punë, a.i. Leyla Moses-Ones e tha këtë javën e kaluar në Konferencën “Politika e Sh.B.A. në Ballkanin Perëndimor”: “Shqipëria tashmë po bën gjënë e duhur duke ushtruar vigjilencë në mbrojtje të rrjeteve të saj. Edhe një herë, disa gjëra në Shqipëri thjesht nuk janë për shitje”. thuhet në një status të Ambasadës së SHBA në Tiranë.
Ky reagim vjen pas disa shkrimeve në mediat pranë opozitës, të cilar aluduan se kryeministri Rama po bashkëpunon me kinezë kundër amerikanëve, për të sjellë kompaninë Huawei, gjë të cilën po e bën Serbia. Por sipas amerikanëve, kjo nuk është e vërtetë në rastin shqiptar, e për këtë referohet fjala e Leyla Moses-Ones.
Lexoni fjalën e saj të plotë këtu: https://bit.ly/2NPPw58 #GazetariCilesore – referon Ambasada Amerikane. /tesheshi.com/
