Partia Demokratike ka reaguar përmes Sekretarit për Aksionin Qytetar, njëherësh deputet i Kuvendit të ri, Ervin Salianji, në lidhje me largimet e disa zyrtarëve të LSI drejt Partisë Socialiste. Përmes një komenti në rrjetet sociale, Salianji akuzon blerjen që po i bëhet përfaqësuesve në nivele të ndryshme të përfaqësuesve politikë, duke mos u ndalur para asgjëje.
“Me të turpshëm janë blerësit që me paratë e krimit dhe korrupsionit që po shkatërron Shqipërinë iu janë turrur me oferta për të blerë kë të munden, kjo është risia e fillimmandatit! Këta nuk ndalen para asgjëje, janë pa skrupuj morale, pa cipë dhe pa asnjë thërrime virtyti. Vesi është virtyti i tyre, paraja është Zoti i tyre!”, shkruan Salianji.
Komenti i plotë i Ervin Salianjit
Paraja është zoti i tyre!
Rilindja e turpëroi veten duke treguar përbuzje për të gjitha virtytet njollosi me të gjitha veset qeverisjen në 4 vjet. Po njësoj po vazhdon me avazin e vjetër dhe në mandatin e ri, me të njëjtën gjuhë përçarëse dhe urrejtje me të njëjtin stil të blerjes së kujtdo!
Po ble dhe po bën bashkë një bandë mjerane mercenarësh, i ble me pozicione në administratë, i majm mirë me paratë që vijnë nga abuzimi dhe keqtrajtimi i qytetarëve dhe më pas i turr në zgjedhje të dhunojne dhe të blejnë kë të munden!
Këta njerëz që shesin veten për 5 aspra e që kapardisen zyrave të shtetit vetëm me damkën e “shkollës së jetës” dhe që sillen pa asnjë lloj ndërgjegje por avantazh kanë vetëm pelivanllëkun janë turpi i kësaj shoqërie!
Me të turpshëm janë blerësit që me paratë e krimit dhe korrupsionit që po shkatërron Shqipërinë iu janë turrur me oferta për të blerë kë të munden, kjo është risia e fillimmandatit! Këta nuk ndalen para asgjëje, janë pa skrupuj morale, pa cipë dhe pa asnjë thërrime virtyti. Vesi është virtyti i tyre, paraja është Zoti i tyre! /tesheshi.com/
