Burime zyrtare saudite kanë dhënë shifra tronditëse të bilancit të viktimave në një nga rrugët mes kampeve të pelegrinëve që kryejnë ritualin e përvitshëm në Mekë.
717 pelegrinë raportohet se kanë humbur jetën ndërsa 800 të tjerë janë plagosur.
Incidenti ndodhi në Mina, në periferi të qytetit të shenjtë të Mekës.
Të plagosurit janë evakuuar në katër spitale të ndryshme të rajonit të Minas ndërsa në vendngjarje vijojnë operacionet e shpëtimit. Helikopterët vijojnë të kryejnë fluturime.
Mina është vendi ku pelegrinët kryejnë të qëlluarit simbolik të djallit duke hedhur gurë. Në këtë vend, ndodhen edhe më shumë se 160 mijë tenda ku pelegrinët kalojnë natën gjatë pelegrinazhit.
Incidenti është më i rëndi në pelegrinazhin e Haxhit që nga korriku i vitit 1990, kur 1426 pelegrinë u shtypën për vdekje në një tunel në afërsi të Mekës. Të dyja rastet kanë ndodhur për Kurban Bajram, në ditën e shënuar të kalendarit të besimit islam dhe dita kur kryhet rituali i të qëlluarit me gurë.
Pelegrinazhi i Haxhit që mbledh përvit numrin më të madh të njerëzve, vitet e fundit ka njohur reduktim të aksidenteve të tilla, për shkak se qeveria saudite ka shpenzuar miliarda dollarë për të përmirësuar dhe zgjeruar infrastrukturën e haxhit dhe teknologjinë për orientimin e fluksit të pelegrinëve.
/tesheshi.com/
