Presioni ndërkombëtar mbi Myanmar-in po intensifikohet, ndërkohë që situata humanitare në Bangladesh po shkon duke u përkeqësuar, nga një valë rraskapitëse e popullatës së Rohingya që po largohet nga dhuna e ushtrisë së.
“Më shumë se 80 fshatra janë djegur që nga 25 gushti në kuadër të fushatës së planifikuar, duke çuar në spastrim etnik përmes politikës së tokës së djegur”, tha Amnesty International.
“Dëshmitë flasin për një karakter të planifikuar, të qëllimshëm dhe sistematik të sulmit”, thotë AI.
OKB bëri thirrje për ndihmë ndaj myslimanëve të Myanmar-it, ku gati 400,000 banorë kanë ikur në Bangladesh dhe shprehu shqetësimin se numri i tyre mund të rritet.
Popullata Rohingya po largohet nga ofensiva ushtarake e ushtrisë së Myanmar-it që filloi pas një sërë sulmesh guerile.
“Ne i kërkojmë bashkësisë ndërkombëtare të rrisë ndihmën humanitare dhe të ndihmojë,” tha Mohamed Abdiker, drejtor për operacione dhe asistencë në Organizatën Ndërkombëtare për Migracion, në një konferencë shtypi në kryeqytetin e Bangladeshit.
Sekretari i Përgjithshëm i OKB-së, Antonio Guterres dhe Këshilli i Sigurimit i OKB-së, të mërkurën i kërkuan Myanmar-it që t’i jepte fund dhunës, të cilën Guterres e përshkroi si spastrim etnik.
Parlamenti Evropian rikujtoi se në vitin 1990 ia dha çmimin “Saharov” Suu Kyi, e cila në atë kohë ishte në paraburgim shtëpiak.
Pas mosreagimit dhe heshtjes së saj për fatin e popullsisë Rohingya, deputetët evropianë po shqyrtojnë mundësinë e anulimit të “Saharov”-it në rast të shkeljes së kritereve që çuan në vendimin për ndarjen e çmimit, në veçanti atë të mbrojtjes së të drejtave të njeriut dhe të drejtave të pakicave.
Përfaqësuesja e Lartë e BE-së për Politikë të Jashtme dhe Siguri, Federica Mogherini rikujtoi se Aung San Suu Kyi ishte një frymëzim për botën demokratike.
“Liderët e Myanmar-it duhet të tregojnë se demokracia për të cilën ata kanë luftuar vlen për të gjithë qytetarët e vendit, pavarësisht dallimeve fetare dhe etnike”, këmbënguli Mogherini.
Ajo përfundoi se “dhuna duhet të ndalet menjëherë” dhe e quajti gjithë “situatën krejtësisht të papranueshme”.
Që nga fundi i gushtit, më shumë se 379.000 Rohingya kanë ikur në Bangladesh për t’i shpëtuar shtypjes së ushtrisë së Myanmar-it.
Aung San Suu Kyi, një ish-disidente dhe fituese e Çmimit Nobel për Paqe në vitin 1991, është një objektiv i kritikave ndërkombëtare pas qëndrimit të saj të padefinuar mbi fatin e minoritetit mysliman të përndjekur në Myanmar. /tesheshi.com/
