Numri i personave të infektuar me koronavirus në Kinën qendrore është ngjitur në 830, me 25 të vdekur, njofton media shtetërore kineze.
Në të njëjtën kohë, provinca kineze Hubei, në të cilën u shfaq virusi, kërkoi ndihmë më të madhe financiare nga autoritetet shtetërore.
Deri më tani, transporti publik është pezulluar në 10 qytete në provincën Hubei.
Qyteti Wuhan ka përshpejtuar ndërtimin e një objekti të ri spitalor me një mijë shtretër për të sëmurët, duke mobilizuar mekanizimin nga persona privatë.
Virusi i ri i përket një grupi virusesh që shkaktuan SARS, një sëmundje që vrau 800 njerëz nëpër botë 17 vjet më parë dhe që gjithashtu u përhap nga Kina.
Rastet e infeksionit me këtë virus janë identifikuar edhe jashtë Kinës, si në Tajvan, Filipine, Tajlandë, Japoni, Kore e Jugut, si dhe një rast në SHBA.
Ndërkohë, dy shtetas kinezë u pranuan me urgjencë në një spital në Glasgow, Skoci, pasi u diagnostikuan me simptoma që mund të tregojnë se ata kishin koronavirus, sipas mediave skoceze.
Sipas informacioneve jozyrtare, pacientët kohët e fundit kanë mbërritur në Skoci nga qyteti kinez Wuhan, epiqendra e epidemisë së rrezikshme. Sipas Telegrafit britanik, ata kishin fluturuar nga Wuhan-i në Londër javën e kaluar dhe kishin udhëtuar prej atje për në Skoci.
Sipas mediave lokale, mjekët deri më tani nuk kanë arritur të përjashtojnë koronavirusin në pacientët e pranuar.
Pacientët për të cilët besohet se janë të infektuar nga virusi i rrezikshëm janë në izolim total, dhe burimet sigurojnë që mjekët kanë marrë të gjitha masat e nevojshme për të parandaluar përhapjen e mundshme të infeksionit. /tesheshi.com/
