Tërmeti me magnitudë 7.8 ballë që goditi Ekuadorin mbrëmjen e së shtunës u ka marrë jetën gjer tani 272 personave, ndërsa numri i të lënduarve është më tepër se 2.000.
Numri i viktimave ka gjasa të rritet ndërsa mbërrijnë njoftimet nga zonat e dëmtuara prej tërmetit.
Operacionet e shpëtimit vazhdojnë, me 10.000 trupa e 3.500 policë të dislokuar në hapësirën e goditur nga lëkundjet e fuqishme.
Ky është tërmeti më i madh në Ekuador që nga viti 1979, i pasuar nga 130 lëkundje më të dobëta.
Presidenti i vendit, Rafael Correa, ndërpreu vizitën në Itali, për t’u kthyer menjëherë në Ekuador.
Ai ka deklaruar gjendjen e jashtëzakonshme, duke e vënë theksin te shpëtimi i të mbijetuarve.
“Çdo gjë mund të rindërtohet, por jetët nuk mund të rikthehen, dhe kjo lëndon më shumë,” ka deklaruar ai. “Ka shenja jete në shumë rrënoja, dhe kjo është përparësia.”
Njëkohësisht ka nisur dhe mbërritja e ndihmave nga jashtë, fillimisht nga Venezuela dhe Meksika. /tesheshi.com/
