Vdekja e një shqiptari në një stacion policie në Athinë, po nxjerr gjithnjë e më shumë fakte se nuk ishte aksidentale siç bëjnë të ditur autoritetet greke.
Babai të ndjerit Pëllumb Marnikollaj, ka bërë të ditur për mediat se tashmë çdo gjë është e qartë: i biri u rrah për vdekje nga policët grekë.
Shkaktarët e vdekjes së djalit tim ma kanë krijuar policia e Athinës. Më datën 3 gusht djali ka shkuar për t’u paraqitur për të zbatuar ato rregullat e tyre sic do qytetar tjetër, për tu paraqitur për të firmosur dhe ka shkuar në polici dhe nuk ka dalë më i gjallë nga aty.
“Sesi kanë ndodhur gjërat unë nuk e di, por nuk jam dakord me atë që thonë ato. Ai ka shkuar me dëshirën e tij për të zbatuar rregullat e tyre, për të firmosur dhe për tu kthyer aty ka ka pasur adresën për tu kthyer, por ata e dhunuan, e masakruan dhe i morën edhe jetën. Ka qëndruar 8 ditë i humbur pa adresë, nuk kishim asnjë lloj informacioni. Jemi munduar të kontaktonim dhe kemi kontaktuar me avokatin, me rajonin e policisë aty dhe na është thënë që nuk është këtu. Ngaqe shkuan shumë ditë dhe ne nuk po komunikonom me të dhe s’patëm asnjë lloj informacioni, ai komunikonte me ne cdo ditë, që në datën 3 ai i humbi kontaktet me të. Në momentin e fundit ka folur djali më të në orën 3 pa njëçerek dhe i ka thënë kam shkuar për të firmosur detyrimin e paraqitjes dhe i ka thënë se do të marr pasi të dal. Gjysëm orë më vonë janë fikur telefonat dhe nuk kemi pasur asnjëlloj lidhje”, tha Nikollë Marnikollaj për mediat.
Ndërkaq, Komiteti Shqiptar i Helsinkit ka kërkuar autoriteteve të Athinës që të nxjerrin përgjegjësitë.
“Është e patolerueshme dhe e dhimbshme që vetë familjarët e viktimës, mbas kërkimeve të shumta dhe të vështira, e gjetën trupin e tij në frigoriferin e varrezës “Agio-Anargiro ”. Si mund të cilësohet “pa identitet” personi ndaj të cilit është urdhëruar me vendim ‘detyrim paraqitje në organet e policisë’?!
Si mund të shpjegohet fakti që autoritetet greke njoftojnë mbi ngjarjen Ambasadën tonë në Athinë vetëm kur kjo e fundit kërkon sqarime, kur Ambasada jonë duhej njoftuar menjëherë kur dihej se viktima ishte shtetas shqiptar?! Për KShH-në, edhe vetë njoftimi është i cekët dhe jo bindës”, thuhet në reagim.
Ky Komitet i kërkon Ministrisë së Jashtme të Shqipërisë që ta ndjekë rastin dhe të mos mjaftohet vetëm me një njoftim formal të policisë greke.
/tesheshi.com/
