Pak ditë pas tragjedisë afër Medelinit në Kolumbi, ku u rrëzua një avion me një ekip brazilian në të, mësohet se pilotët e tij kanë zgjedhur të mos ndalojnë gjatë udhëtimit për një rifurnizim të planifikuar.
Gjithçka është bërë për të fituar kohë, pasi pilotët kanë vendosur të mos ndalen për shkak të një vonese.
Avioni me 77 persona në të, veç personelit, e ku gjendej dhe Chapecoense, ekipi brazilian i futbollit, do duhej të ndalonte në Kobija, në Bolivi, përpara se të drejtohej për në vendmbërritjen përfundimtare.
“Kur kompania, përfaqësuesi i saj në Kolumbi, dorëzoi aplikimin për autorizimin e fluturimit, theksonte se ai [avioni] po vinte nga qyteti i quajtur Kobija, në kufirin me Perunë dhe Brazilin,” ka deklaruar një punonjës i autoritetit të aviacionit civil të Kolumbisë.
Shtyrja e fluturimit për më shumë se një orë e kishte bërë të pamundur rifurnizimin në Kobija, pasi aeroporti i këtij qyteti nuk funksiononte natën. Sipas mediave braziliane, pilotët mund ta kishin rifurnizuar avionin në Bogota, por zgjodhën të fluturojnë pandërprerë drejt Medelinit.
Një vonesë tjetër në pritje të uljes në Medelin duket se ka sjellë dhe rrëzimin e avionit.
Rregullat ndërkombëtare të sigurisë ajrore kërkojnë që një avion të ketë karburant të mjaftueshëm për të fluturuar dhe 30 minuta përtej mbërritjes në destinacion. Mungesa e gjetjes së mbetjeve të karburantit në vendngjarje e përforcon versionin e rrëzimit të avionit nga mbarimi i lëndës djegëse. /tesheshi.com/
