Ish-ministri i Financave Arben Malaj, ish-deputet i PS-së në disa legjislatura, ka reaguar në lidhje me lajmin për rikthimin e vizave për qytetarët shqiptarë pas kërkesës së institucioneve të Holandës, më konkretisht policisë dhe prokurorisë së vendit anëtar të BE-së.
Përmes një komenti në rrjetet sociale, Malaj shkruan se nëse lajmi është i vërtetë, atëherë duhet të konfirmohet nga Ministria e Jashtme e Shqipërisë dhe duhet nisur një bashkëpunim mes dy qeverive.
Ish-ministri shkruan se kërkesat e herë pas hershme që BE kushtëzon vendet kandidate apo aspirante nuk bëhen për të ushqyer agresivitetin partiak, por për të perafruar qëndrimet dhe angazhimet e përbashkëta të të gjithë faktorëve politikë dhe shoqërorë.
Reagimi i Arben Malajt:
Lajmi se qeveria holandeze ka kërkuar rikthimin pjesor të kushtëzimeve për lëvizjen e lirë të shqiptarëve po sundon debatet publike dhe politike.
Në qoftë se lajmi është i vërtetë çdo shqetësim është i përligjur dhe një bashkëpunim sa më efektiv me qeverinë hollandeze është imediat.
Nëse lajmi nuk është i vërtetë, çdo angazhim publik alarmues është jo i drejtë dhe jo produktiv.
Së pari – duhet që ky lajm të konfirmohet nga Ministria e Jashtme;
Së dyti – procesi i integrimit europian është i gjatë dhe gjatë kësaj periudhe të gjatë herë pas here vende të ndryshme mund të paraqesin shqetësime të ndryshme.
Shpesh herë në vendet e BE gjatë periudhave të tyre elektorale, tensionet kundër hapjes së kufijve dhe tregut të punës dhe sidomos agresiviteti kundër emigrantëve është pjesë e platformave elektorale sidomos në vendet ku e djathta radikale ka gjetur akses në parlament.
Së treti – analiza serioze e këtyre kërkesave dhe bashkëpunimi me këto vende dhe institucionet e BE-së për t´i sqaruar, zbutur apo reduktuar këto shqetësime mbetet prioritet i përhershëm i qeverisë dhe Parlamentit.
Se katërti – kërkesat e herë pas hershme që BE kushtëzon vendet kandidate apo aspirante nuk bëhen për të ushqyer agresivitetin partiak, por për të perafruar qëndrimet dhe angazhimet e përbashkëta të të gjithë faktorëve politikë dhe shoqërorë.
Së pesti – koha e paqartësive, periudhat e keqpërdorimit të lajmeve jo të vërteta duhet të jete sa më e shkurter, për këtë kërkohet transparencë për çdo kërkesë, për çdo kushtëzim dhe sidomos angazhim konkret për plotësimin e kërkesave, si edhe për reduktimin dhe eleminimin e pengesave në proçesin e ndërtimit të shtetit ligjor dhe anëtarësimit në BE. /tesheshi.com/
