Nga Blendi Gashi
Gazeta gjermane ‘Tagesspiegel’ ditë më parë ia ka kushtuar një artikull Kosovës, duke vënë theksin se paqeruajtësit gjermanë nuk do të largohen nga Kosova, ashtu siç është planifikuar më parë siç thuhet për shkak të tensioneve të reja.
Se mund të ketë destabilizim të situatës në Kosovë përmes një shkrimi ka raportuar edhe portali ynë, tesheshi.com.
Një burim i tesheshi.com, ka thënë se Serbia është duke punuar shumë për destabilizimin e pjesëve të ndryshme të Kosovës, posaçërisht asaj veriore, në prag të hapjes së kapitullit 35 me BE-në, kapitull ky që ka të bëjë me normalizimin e tërësishëm të marrëdhënieve me Kosovën.
Sipas burimit, ditëve të fundit në veri të Kosovës kanë hyrë dhjetëra kriminelë serbë të cilët kanë vetëm një qëllim: që me armë të ndryshme të kryejnë incidente para së gjithash në vende me popullatë të përzierë, me qëllim që këto sulme t’jua faturojnë shqiptarëve.
Portali tesheshi.com ka marrë mendimin e eksperëtve të sigurisë për këtë temë mjaft të ndjeshme.
Ata thonë se Serbia nuk po lë gurë pa lëvizur jo vetëm për ta destabilizar situatën në Kosovë, por edhe për të bërë një eskalim të përmasave të mëdha që do ta vënin në pikëpyetje funksionimin e shtetit.
Shteti të kryej detyrat e shtëpisë
Eksperti i çështjeve të sigurisë, Drizan Shala thotë se është në dijeni se KFOR-i ka bërë paralajmërime se situata e sigurisë në Kosovë mund të eskaloi, por sipas tij brengë është se edhe pas kësaj institucionet vendore të sigurisë po hezitojnë për të vepruar konform parimeve dhe procedurave ligjore të aplikuara në vend.
“Institucionet kosovare përveç deklarimeve politike duhet të merren me vlerësimin e dëmit të shkaktuar nga ‘Mbrojtja Civile’, structure kjo e cila është futur në kuadër të Policisë së Kosovës dhe më pastaj ta ridefinojë strukturën në Regjionin Veri të Mitrovices me kuadro multietnike me më shum shqiptar e jo sikur deri më tani”.
“KFOR-i por edhe EULEX-i në vitin 2016 do të bëjnë përpjekje që strukturat e krimit të organizuar në atë pjesë t’i luftojnë me veprime konkrete operative-hetimore dhe nga kjo lëvizje priten sipas përfaqësuesve të Bashkësisë Ndërkombëtare (KFOR, EULEX) që siguria do të përshkallëzohet në atë pjesë”, ka deklaruar Shala në një prononcim për tesheshi.com.
Eksperti Shala thotë organet e sigurisë që janë kompetente për ta mbrojtur rendin dhe sigurinë në vend, në veçanti Policia e Kosovës ka kapacitete njerëzore për ta ndihmuar faktorin ndërkombëtarë të sigurisë, por jo edhe kapacitete teknike për intervenuar në situata të ndërlikuara në veri të vendit.
Njohësi i çështjeve të sigurisë dhe politikës në vend, Baki Azemi, në një prononcim dhënë për tesheshi.com thotë se strukturat paralele që veprojnë në Kosovë por edhe në vetë institucionet e Kosovës, në emër të parimit kushtetues të multietnicitetit të të gjitha segmenteve shtetërore, të mandatuar dhe kontrolluarve deri në margjinalizim nga qeveria dhe Shërbimi Sekret i Beogradit, po punojnë, jo vetëm në destabilizimin e situatës në Kosovë, por për eskalim përmasash që do ta vënin në pikëpyetje funksionimin e shtetit tonë.
“Përfaqësuesit institucionalë të Kosovës, janë në dijeni të këtyre përpjekjeve dhe për strukturat e BIA-s që veprojnë në në mënyrë të organizuar në veri të Kosovës dhe të udhëhequra drejtëpërsëdrejti nga Beogradi. Kjo ndodhe ngase udhëheqësit tonë institucional janë peng i kushtëzimeve politike nga faktori ndërkombëtarë”.
“Qëndrimi neutral i NATO-s dhe KFOR-it ndaj statusit të Kosovës është një tjetër situatë që po e hendikepon ndërtimin e sistemit të sigurisë në Kosovë dhe mekanizmave për ofrimin e sigurisë në vend si: Forcat e Armatosura, Inteligjenca Kombëtare e me theks ajo ushtarake; mos impenjimi serioz i NATO-së në vendosjen e kontrollit mbi territore të kontestuara, që mund ti shërbejnë interesave gjeostrategjike të kontrollit të hapësirës tokësore dhe asaj ajrore të Kosovës. Por, barra kryesore bie mbi institucionet vendore për moskryerjen e detyrave shtëpiake për të vendosur sundimin e ligjit përmes instalimit të trinomit; transparencë, përgjegjësi dhe llogaridhënje”, ka deklaruar Azemi.
/tesheshi.com/
