Nga Blendi Gashi
Edhe pse kanë kaluar saktësisht 16 vite nga përfundimi i luftës në Kosovë, përdorimi i armëve pa leje vazhdon të jetë një shqetësim i madh për shoqërinë kosovare dhe institucionet e sigurisë.
Shkaktarët kryesorë për pjesën dërmuese të vrasjeve dhe të një sërë krimesh që ndodhin në vend, janë pikërisht armët në posedim të paligjshëm nga qytetarët.
Por përkundër kësaj edhe një numër tejet i madh i armëve ilegale vazhdon të mbetet në pronësi të qytetarëve, pasi institucionet përgjegjëse të sigurisë ende nuk kanë arritur t’i fusin nën kontroll armët e vogla dhe të lehta, të cilat qarkullojnë në territorin e shtetit.
Në muajin korrik të vitit 2015, Kosova miratoi ligjin e ri për armët, me të cilin ligj persona, të cilët posedojnë armë pa leje, mund të gjobiten dhe të marrin dënime me burg.
Por përkundër miratimit të këtij ligji, gjendja reale në teren tregon më së miri se ai nuk respektohet.
Sidomos muajt e verës që njihet edhe si muaj të dasmave e dëshmon më së miri moszbatimin e ligjit në fjalë pasi shumë persona në ahengje të ndryshme gjuajnë me armë në vazhdimësi, derisa shumë akterë nuk kapen as nga policia.
Policia e Kosovës e pranon se numri i armëve ilegale në duar e qytetarëve është i lartë, gjë që paraqet shqetësim dhe rrezik për sigurinë.
Baki Kelani, zëdhënës i Policisë së Kosovës, ka deklaruar për mediat se për konfiskimin e armëve ilegale, policia ka plane të veçanta.
“Posedimi i armëve pa leje, mund të paraqesë problem në gjithë botën, e jo vetëm në rajonin e Kosovës, sepse çdo posedim i kundërligjshëm i armëve është në kundërshtim me dispozitat ligjore. Mund të themi se ende ka prezencë të armëve në duart e qytetarëve, mirëpo kjo dukuri, nga viti në vit është duke u përmirësuar“, ka deklaruar Kelani, për mediat kosovare.
Nevoitet program gjithëpërfshirës për largimin e armëve ilegale
Ekspertët e sigurisë thonë se institucionet në bashkëpunim me qytetarët duhet të ndërtojnë një program të veçantë për largimin e armëve ilegale.
Burim Ramadani, njohës i çështjeve të sigurisë thotë se numri i armëve ilegale, të vogla dhe të lehta, në duart e qytetarëve është jashtëzakonisht i madh dhe shqetësues për sigurinë.
Ramadani, thotë se duhet të ndërtohet një program gjithëpërfshirës për largimin e armëve ilegale.
“Nuk është vetëm çështje e një ligji, por duhet program i plotë. Incidentet me armë të zjarrit janë të shumta, sikurse edhe rreziku nga armët është shumë i madh. Institucionet e Kosovës në bashkëpunim me komunitetin (qytetarët) duhet të fillojnë një program të veçantë në të cilin do të përfshiheshin shumë elemente që mundësojnë largimin e armëve ilegale”, ka thënë Ramadani, për tesheshi.com.
Ndryshe, në fillim të këtij muaji, institucionet e Kosovës, të mbështetura edhe nga disa organizata ndërkombëtare, që veprojnë në vend me rastin e ditës ndërkombëtare për shkatërrimin e armëve të vogla, shkatërruar rreth 2,400 armë të vogla dhe të lehta. /tesheshi.coom/
