Humbja ndaj Bolivisë më 28 mars, renditja në vend të pestë në grupin amerikanolatin të kualifikueseve për Botërorin e vitit të ardhshëm, dënimi i gjatë i Messi-t, që nuk do të luajë ndaj Uruguajit më së paku kur ndeshjet të rinisin në gusht…
Një tablo nga e cila drejtuesit e futbollit argjentinas kanë menduar të shpëtojnë duke shkarkuar trajnerin e përfaqësueses, Edgardo Bauza.
Vetëm tetë muaj; kaq ka zgjatur aventura e 59-vjeçarit në krye të një prej përfaqësueseve me shumë emra të mëdhenj, por me po kaq probleme të mëdha.
Bauza do ta niste punën në gushtin e 2016-s, me t’u larguar Gerardo Martino pas humbjes në finalen e Kupës së Amerikës.
“Kemi arritur një marrëveshje, i kemi thënë Bauza-s se ka pushuar së qeni trajneri i ekipit kombëtar,” do t’u deklaronte gazetarëve presidenti i Federatës Argjentinase të Futbollit, Claudio Tapia.
Jorge Sampaoli, trajneri aktual i Seviljes, është emri më i lakuar si zëvendësuesi i mundshëm i Bauza-s. /tesheshi.com/
