Ish-ministrja e punëve të brendshme në Maqedoni, Gordana Jankullovska pas marrjes në pyetje për rastin “Fortesa”, nga ana e Prokurorisë Speciale, e ndikuar nga stresi dhe frika se për akuzat ndaj saj dënimi sipas Kodit penal është nga 5 deri në 20 vjet burg, ka deklaruar se kjo prokurori nuk paraqet një institucion të pavarur, por se është nën urdhërat e liderit të LSDM-së, Zoran Zaevit.
“Prokuroria Speciale punon me urdhër të Zoran Zaevit dhe ajo çdoherë aktivizohet sipas nevojave të tyre”, tha pas seancës dëgjimore Jankulloska.
Ajo nuk deshi të japë detaje se për çka është folur në PSP dhe tha se do të respektojë procedurën parahetimore, ndërsa për më shumë informata të pyetet prokuroria.
Jankulloska është shprehur se përveç në Prokurorinë Speciale Publike, për këto procedura parahetimore ka qenë në seancë dëgjimore edhe në organin tjetër të akuzësm Prokurorinë Publike Themelore.
Kujtojmë se rasti “Fortesa”, ka të bëjë me përgjimet e paautorizuara dhe të paligjshme të pushtetit.
Në këtë lëndë janë përfshirë 5 zyrtarë në mesin e tyre edhe ish-ministrja Jankulloska dhe dy kryeshefë në DSK. Këta dy të fundit kanë keqpërdorur detyrën zyrtare duke shkatërruar pajisjet me te cilat kanë përgjuar në mënyrë të paligjshme, në mënyrë që të zhduken argumentet të cilat mund të provoheshin kundër tyre.
Këto përgjime të pautorizuara dhe të paligjshme kishin të bëjnë me periudhën e vitit 2008-2015, me ç‘rast më vonë erdhën deri te duart e liderit të LSDM-së, Zoran Zaev dhe ky i fundit zbuloi thuajse gjitha bisedat e funksionarëve të inkriminuar nën moton “E vërteta për Maqedoninë”.
Në këtë formë, pas publikimit të bombave, filloi kriza më e thellë politike në Maqedoni që nga shpallja e saj si shtet i pavarur. Nga ajo ditë e deri më sot, Maqedonia ende nuk mund të formon një qeveri stabile. /tesheshi.com/
