Kreu i PDIU-së Shpëtim Idrizi i bëri thirrje presidentit Bujar Nishani të thërrasë në një tryezë të gjithë partitë politike për të gjetur një zgjidhje për atë që e cilësoi si “krizë të thellë me të cilën po përballemi përditë”
Përmes një konference të poasaçme për mediat nga kryesia e Kuvendit Idrizi e konsideroi urgjente thirrjen e tryezës nga ana e presidentit Nishani. “Partia për Drejtësi, Integrim dhe Unitet sugjeron urgjencën e thirrjes së tryezës politike nga ana juaj për të gjetur një zgjidhje të menjëhershme politike. Në mënyrë që nesër ju të mos jeni të detyruar të thërrisni tryezën e Këshillit të Sigurisë Kombëtare”, tha Idrizi.
Ndërkaq, ai ka kërkuar edhe një marrëveshje të re me partinë Socialiste, duke shtuar se aleancat nuk vendosen nga një votim, duke iu referuar këtu rrëzimit të emrit të tij për anëtar të Komisionit të vettingut.
“Pa dyshim vazhdojmë të jemi në një aleancë. Aleanca nuk vendoset nga një votim apo nga një mosmarrëveshje. E përsëris prap, sa më shumë aktorë politikë të marrin pjesë aq më shumë garanci do ketë reforma në drejtësi që të jetë e gjithëpranuar. Ne jemi pjesë e kësaj mazhorance. Ka pasur një diskutim të munguar prej disa muash midis nesh, me kërkesën tonë që të flasim për një marrëveshje të re, deri më sot nuk është realizuar”, përfundoi Idrizi. /tesheshi.com/
