Nga Bashkim Kastrati
Një lajm i mirë vjen nga Ministria e Shëndetësisë (MSh) për Qendrën Klinike Universitare të Kosovës (QKUK). Kjo qendër tash e sa vite përballet me mungesë të shumë aparaturave të cilat janë të domosdoshme për diagnostikimin dhe trajtimin e pacientëve. Pacientët presin deri në një vit për të bërë një incizim me rezonancë magnetike, ndërsa duhet pritur me muaj të tërë për të realizuar incizime tjera në këtë institucion shëndetësor.
Të gjitha klinikat e QKUK-së kanë nevojë për aparatura të reja mjekësore, pasi që aktualisht kanë disa të vjetra, disa janë jashtë funksionit dhe disa nuk kanë fare disa nga aparaturat që janë të domosdoshme për disa nga klinikat.
Zyra për informim e Ministrisë së Shëndetësisë ka konfirmuar për tesheshi.com se do të bëhet një investim rreth 50 milionë euro për blerjen e aparaturave të ndryshme në QKUK. Këto investime janë të domosdoshme dhe për këtë arsye mjetet financiare do të mbulohen nga qeveria, ndonjë donator apo do të merret një kredi. Opsioni i fundit ka gjasa reale që do të përdoret për realizimin e këtij projekti.
Zyra për informim e Ministrisë së Shëndetësisë (MSh) përmes postes elektronike ka thënë për tesheshi.com se ky projekt është miratuar në Këshillin Nacional për investime. Sipas kësaj ministrie tash e tutje, çdo ditë e punës së qeverisë nënkupton edhe angazhimin për realizimin e këtij projekti, i cili do të zhvillohet në vijim, varësisht prej interesimit që do të ketë për të gjetur investitorët e mundshëm, lidhjen e ndonjë kredie apo, donatorët dhe bashkëfinancimin. Pra, janë disa drejtime në të cilat MSH dhe qeveria duhet të punojnë që projekti të realizohet gradualisht.
“Deri tash, në fushën e shëndetësisë janë duke u zhvilluar dy projekte përmes huamarrjes apo kredisë: Ai i me Bankën Botërore për të mbështetur reformat në sektorin e shëndetësisë dhe kredia me Austrinë për fuqizimin e shërbimeve të kardiologjisë invazive dhe kardiokirurgjisë në Qendrën Klinikë Universitare të Kosovës. E para ka filluar më herët, ndërsa e dyta është në fillim të saj. Ngjashëm, sigurisht do të provohet të bashkëpunohet edhe me mekanizma dhe shtete të tjera, të cilave MSh, përkatësisht Qeveria e Kosovës do t’ua prezantojnë projektin”, thuhet në përgjigjen e zyrës për informim të MSh-së.
Sipas kësaj ministrie, përvoja tregon se elaborimi i mirë i projekteve dhe qëllimi i mirë mund të sjellin edhe rezultate siç është shembull rasti me Emiratet e Bashkuara Arabe që kanë rinovuar komplet Spitalin e Vushtrrisë në vlerë prej 7 milionë eurove dhe kanë për të mbështetur ndërtimin e Spitalit Pediatrik Kirurgjik në QKUK në vlerë prej 22 milionë eurove.
Ja cilat klinika do të përfitojnë nga ky projekt
Sipas MSH-së, kërkesat i kanë vlerësuar vet klinikat, por pastaj MSH ka angazhuar fondacionin amerikan “Project Hope” për t’i bërë një vlerësim projekteve të paraqitura nga SHSKUK, nëse ato janë të vlerësuar drejt apo jo dhe për fat të mirë, analiza e bërë nga “Project Hope” ka treguar se drejtuesit e klinikave të QKUK-së dhe spitaleve të përgjithshme kanë bërë një analizë reale të nevojave të tyre. Pas kësaj, MSH e ka proceduar në Këshillin Nacional për Investime projektin, i cili është miratuar nga Këshilli.
“Me këtë projekt do të mundësohet kompletimi i Klinikës Emergjente e cila është në ndërtim e sipër, pastaj sistemin e diagnostikimit ku në klinikën e Radiologjisë, pastaj sistemi i Onkologjisë i cili shërbim ka rritur shërbimet ndaj qytetarëve në vitet e fundit”, thuhet në përgjigjen e MSH-së.
MSH thotë se ka kërkesa prej pajisjeve nga më të thjeshtat e deri të ato më moderne. Përfshirë aparaturë, mjete për kabinete diagnostikuese, sisteme të ndryshme të pajisjeve, pajisje intervenuese, sete të ndryshme, dhe lloj -lloj sistemesh që ju hyjnë në punë klinikave dhe spitaleve të ndryshme.
“Me këtë projekt do të kompletohet nevojat për aparaturë medicinale në QKUK dhe do të ndikonte në rritjen e numrit dhe cilësisë së shërbimeve në të gjitha fushat e nivelit terciar” thuhet në përgjigjen e zyrës për informim të Ministrisë së Shëndetësisë.
Përndryshe, shumë pacientë të Kosovës shkojnë në sektorin privat ose jashtë vendit për diagnostikim dhe trajtim. Në vazhdimësi është raportuar se qindra miliona euro kanë shpenzuar qytetarët e Kosovës për shërbime mjekësore jashtë vendit.
Duke e marrë parasysh këtë situatë, një investim i tillë është i mirëseardhur dhe i domosdoshëm për të përmirësuar shërbimet spitalore në këtë institucion shëndetësor. /tesheshi.com/
