Kryeministri Kurti dha detaje në lidhje me rrëmbimin e tre efektivëve të Policisë së Kosovës nga forcat serbe, duke thënë se kanë qenë duke drekuar në çastin kur janë rrëmbyer.
Në një konferencë për mediat, ai tha se ambasadori Jetish Jashari i ka vizituar tre efektivët, të cilët i kanë shpjeguar se si ka ndodhur ngjarja.
“Rrëmbimi është zhvilluar me plan me njerëz të armatosur. Nuk bëhet fjalë për arrestime në Serbi, por bëhet fjalë për rrëmbim brenda Kosovës. Ambasadori Jetish Jashari i ka vizituar policët, ndarazi, njëri pas tjetrit, përshkrimi i tyre se si ka ndodhur rrëmbimi është i njëjtë. Ata kanë qenë tek tryezës e improvizuar për ngrënie. Kjo pra kanë qenë duke ngrëne drekë. Kanë qenë 15 persona kur i kanë sulmuar dhe i kanë rrëmbyer. Kjo heq çfarëdo dileme edhe për ata që dëshirojnë të jenë skeptikë”, tha Kurti.
Në këto rrethana, Kurti i bëri thirrje faktorit ndërkombëtar të dënojë aktin e Serbisë dhe t’i kërkojnë menjëherë lirimin e ushtarëve të Kosovës.
“Kërkojmë lirmin e menjëhershëm, pa kushte dhe të pacenuar, kërkojmë nga faktorët ndërkombëtar, SHBA, BE dhe NATO që ta dënojnë agresionin e Serbisë”, tha ai. /tesheshi.com/
