Mikhail Gorbachev, lideri i fundit sovjetik, ishte i tronditur dhe i hutuar nga konflikti në Ukrainë në muajt para se të vdiste, dhe në vitet e fundit i shkatërruar psikologjikisht nga përkeqësimi i lidhjeve të Moskës me Kievin, tha ish-përkthyesi i tij.
Pavel Palazhchenko, i cili punoi me presidentin e ndjerë sovjetik për 37 vjet dhe ishte pranë tij në samite të shumta SHBA-Sovjetike, foli me Gorbachev-in me telefon disa javë më parë, duke vënë në dukje se ai dhe të tjerët ishin të goditur nga sa i traumatizuar ishte ish-udhëheqësi i fundit sovjetik nga ngjarjet në Ukrainë.
“Jo vetëm operacioni (ushtarak special) që filloi më 24 shkurt, por i gjithë evolucioni i marrëdhënieve midis Rusisë dhe Ukrainës gjatë viteve të kaluara ishte një goditje vërtet e madhe për të. Me të vërtetë e shtypi atë emocionalisht dhe mendërisht”, tha Palazchenko në një intervistë me Reuters.
“Na ishte shumë e qartë në bisedat tona me të se ai ishte i tronditur dhe i hutuar nga ajo që po ndodhte (pas hyrjes së trupave ruse në Ukrainë në shkurt) për arsye të ndryshme. Ai besonte jo vetëm në afërsinë e popujve rus dhe ukrainas, por se këta dy popuj janë të ndërthurur”, shtoi ai.
Presidenti Vladimir Putin e quan luftën në shkallë të gjerë, e cila filloi me pushtimin rus më 24 shkurt, një “operacion special ushtarak”.
Shtatëdhjetë e tre vjeçari Palazhchenko, i cili punon në Fondacionin Gorbachev, e pa këtë të fundit në muajt e fundit të jetës së tij dhe është në kontakt me vajzën e tij Irina.
Pozicioni i Gorbachev-it për Ukrainën ishte kompleks dhe kontradiktor, thotë Palazhchenko, sepse politikani i ndjerë ende besonte në idenë e Bashkimit Sovjetik. /tesheshi.com/
