Nga Ahmet Zani
Shkëlqim Aliajn nga Tropoja e ka gjetur një hall i madh. Tipike prej atyre halleve të tranzicionit, ku të gjuen belaja me njerëzit e tu, pra ata të një gjaku dhe më të afërmit madje
Prej disa vitesh, 35 vjeçari ka ndërtuar një shtëpi në Kamzë, atje ku është dyndur e gjithë veriu. Por që ka zgjedhur njëherësh të shfrytëzojë edhe emigracionin. Paradokohësh, ai do largohej nga shtëpia duke lënë nënën e sëmurë, por me një njeri mbi kokë për t’u përkujdesur, ama jo nga gjaku, të cilin e kishte pak metra larg. Më saktë vëllanë Shpëtimin, pikërisht atë me të cilin e ka gjetur halli i madh.
Një vit më parë nëna ndahet nga jeta dhe, ndërsa Shkëlqimi kthehet për varrimin e të ëmës, përballet me një gjë të pabesueshme, teksa sheh shtëpinë e tij të gllabëruar.
I vëllai as nuk denjon ta sqarojë, e po kështu edhe të afërmit nuk i dalin krah. E tani, Shkëlqimit nuk i mbetet asgjë tjetër, por por t’i drejtohet gjykatës për të rimarrë shtëpinë që pretendon se ia ka rrëmbyer i vëllai me pa të drejtë.
Por ai edhe në këtë rast po has vështirësi me një odise burokratike, duke dyshuar që dhe këtu ka gisht i vëllai. Shkëlqimi ka ankimuar tek Komisariati i Policisë në Kamzë si dhe tek organet e Prokurorisë, por që thotë se është zhgënjyer nga pritja që i është bërë. Në krah të tij është gjendur dhe avokati Sami Dema, i cili isponon tërë dokumentacionin e nevojshëm duke pritur zgjidhjen e këtij ngërç mes vëllezërve tropojanë, tashmë banorë të Kamzës.
Dhe kjo është një ndër ato qindra histori shqiptare të tranzicionit, ku njerëzit, qoftë dhe të një gjaku, i hyjnë në hak njëri-tjetrit pa asnjë vraje ndërgjegje, duke i përvetësuar pronën. /tesheshi.com/
